ფსალმუნები — ახალი გადამუშავებული გამოცემა 2015

თავი 131

1. 1
   უფალო, გაიხსენე დავითი და ყოველი ტანჯვა მისი.
2. 2
   როგორ შეჰფიცა უფალს, აღთქმა დაუდო იაკობის ძლიერს:
3. 3
   არ შევალ ჩემი სახლის კარავში, არ ავალ ჩემს სარეცელზე.
4. 4
   არ მივცემ ძილს ჩემს თვალებს და თვლემას ჩემს წამწამებს,
5. 5
   ვიდრე არ ვიპოვი ადგილს უფლისთვის, სამკვიდროს იაკობის ძლიერისთვის.
6. 6
   აჰა, გვესმა მასზე ეფრათში, იაყარის ველზე ვპოვეთ იგი.
7. 7
   მივიდეთ მის სადგომებში და დავემხოთ მის ფეხთა სადგამთან.
8. 8
   აღსდექ უფალო და მიდი შენს სავანეში, შენ და შენი ძლიერების კიდობანი.
9. 9
   სიმართლით შეიმოსონ შენი მღვდელნი და შენმა წმიდანებმა სიხარულით იყიჟინონ.
10. 10
    შენი მსახურის დავითის გამო, ნუ უკუაგდებ შენი ცხებულის სახეს.
11. 11
    უფალმა შეჰფიცა დავითს ჭეშმარიტებით და არ გადაუხვევს მისგან: "შენი მუცლის ნაყოფს დავსვამ შენს ტახტზე.
12. 12
    თუ დაიცავენ შენი ძენი ჩემს აღთქმასა და მცნებებს, რომელთაც ვასწავლი, მათი შვილებიც უკუნისამდე ისხდებიან შენს ტახტზე”.
13. 13
    რადგან სიონი ამოირჩია უფალმა, თავისთვის ისურვა სამკვიდრებლად.
14. 14
    "მარადიულად ეს არის ჩემი მოსასვენებელი ადგილი, აქ დავმკვიდრდები, რადგან ასე ვისურვე.
15. 15
    უხვად ვაკურთხებ მის საზრდოს და პურით გავაძღებ მის ღარიბებს.
16. 16
    გადარჩენით შევმოსავ მის მღვდლებს და მისი წმიდანები ხმამაღლა იგალობებენ.
17. 17
    იქ აღმოვაცენებ დავითის ღირსების რქას, ლამპარი გავმართე ჩემი ცხებულისთვის.
18. 18
    სირცხვილით შევმოსავ მის მტრებს, მასზე კი მისი გვირგვინი იბრწყინებს!”