იგავნი სოლომონისა — ახალი გადამუშავებული გამოცემა 2015
იტვირთება წინა თავი
თავი 2
- 1შვილო, თუ ჩემს სიტყვებს მიიღებ და ჩემს მცნებებს გულში დაიუნჯებ,
- 2სიბრძნეს ყურს მიაპყრობ და გონიერებისკენ მიმართავ გულს,
- 3თუ საზრიანობას მოუხმობ და გონიერებისთვის აიმაღლებ ხმას,
- 4თუ ვერცხლივით მოიძიებ მას და დაფარული განძივით დაუწყებ ძებნას,
- 5მაშინ ჩაწვდები უფლის მოშიშებას და ღვთის შემეცნებას მოიპოვებ.
- 6რადგან უფალი იძლევა სიბრძნეს, მისი ბაგიდან გამოდის ცოდნა და გონიერება.
- 7სიბრძნეს უნახავს მართლებს, ფარია იგი უბიწოდ მოარულთათვის,
- 8რადგან თვალყურს ადევნებს სამართლის ბილიკებს და იცავს ღვთისმოსავთა გზას.
- 9მაშინ მიხვდები - რა არის სიმართლე, სამართალი და სამართლიანობა - ყველა ბილიკი სიკეთისა;
- 10როდესაც სიბრძნე შევა შენს გულში და ცოდნა ეამება შენს სულს,
- 11გამჭრიახობა დაგიცავს და გონიერება შეგინახავს,
- 12რომ გიხსნას ბოროტების გზიდან, უკუღმართად მოლაპარაკე კაცისგან,
- 13სწორი ბილიკების მიმტოვებელთაგან, სიბნელის გზებით რომ დადიან,
- 14ბოროტების კეთებით ხარობენ და ბოროტეულთა უკუღმართობა სიამოვნებთ,
- 15რომელთა გზებიც მრუდეა და ბილიკები - უკუღმართი,
- 16რათა გიხსნას უცხო ქალისგან, უცხოტომელისგან, რომლის ნათქვამიც ლაქარდიანია,
- 17რომელმაც მიატოვა სიყრმის მეგობარი და თავისი ღმერთის აღთქმა დაივიწყა.
- 18მისი სახლი სიკვდილში იძირება და მისი ბილიკები მკვდრებისკენ მიემართება.
- 19უკან არავინ ბრუნდება მასთან შემსვლელთაგან და ვეღარ დგება სიცოცხლის ბილიკებზე.
- 20შენ კი კეთილთა გზით იარე და მართალთა ბილიკებზე იფხიზლე,
- 21ვინაიდან, წრფელნი დამკვიდრდებიან ქვეყანაზე და უმწიკვლონი დარჩებიან მასში,
- 22ბოროტნი კი მოიკვეთებიან ქვეყნიდან და მოღალატენი აღმოიფხვრებიან.
იტვირთება შემდეგი თავი