იგავნი სოლომონისა — ახალი გადამუშავებული გამოცემა 2015
იტვირთება წინა თავი
თავი 4
- 1ისმინეთ შვილებო მამის დარიგება, ყური დაუგდეთ, რომ გონიერება შეიძინოთ.
- 2რადგან ჯანსაღ მოძღვრებას გაძლევთ; ჩემს შეგონებებს ნუ მიატოვებთ.
- 3მეც სათუთი შვილი ვიყავი მამაჩემისა და ერთადერთი დედის წინაშე.
- 4მასწავლიდა მამაჩემი და მეუბნებოდა: "გულში შეინახე ჩემი სიტყვები, დაიცავი ჩემი მცნებები და იცოცხლებ.
- 5შეიძინე სიბრძნე, შეიძინე გონიერება, ნუ დაივიწყებ და ნუ გადაუხვევ ჩემს სიტყვებს.
- 6ნუ მიატოვებ და ის დაგიცავს, გიყვარდეს და ის შეგინახავს.
- 7სიბრძნის დასაწყისი სიბრძნის მოხვეჭაშია, მთელი შენი ქონებით გონიერება შეიძინე.
- 8დააფასე იგი და აგამაღლებს; პატივს მოგაგებს, თუ გულში ჩაიკრავ.
- 9თავზე მადლის შარავანდედს დაგადგამს, დიდების გვირგვინს გიბოძებს”.
- 10ისმინე შვილო, მიიღე ჩემი ნათქვამი და გაგიმრავლდება სიცოცხლის წლები.
- 11სიბრძნის გზისკენ მიგმართე და სწორ ბილიკებზე წარგიძეხი.
- 12სიარულისას, არ დაგიბრკოლდება ნაბიჯი და გაქცევისას - არ წაბორძიკდები.
- 13ჩაეჭიდე დარიგებას, არ გაუშვა, დაიცავი, რადგან შენი სიცოცხლეა იგი.
- 14ბოროტეულთა ბილიკს ნუ დაადგები და სიავის გზაზე ნუ ივლი.
- 15თავი აარიდე, ახლოსაც ნუ ჩაუვლი, გადაუხვიე და გაიარე.
- 16რადგან ვერ იძინებენ, თუ სიავე არ ჩაიდინეს; ძილი უკრთებათ, თუ ვინმეს არ ავნეს,
- 17რადგან ბოროტების პურს ჭამენ და ძალადობის ღვინოს სვამენ.
- 18მართალთა ბილიკი განთიადის სინათლეს ჰგავს, რომელიც უფრო და უფრო ძლიერდება შუადღემდე.
- 19წყვდიადივითაა ბოროტეულთა გზა: არ იციან, რაზე წაბორძიკდებიან.
- 20შვილო, ჩემს სიტყვას მოუსმინე, ჩემს ნათქვამს დაუგდე ყური.
- 21თვალი არ მოაშორო, გულის წიაღში შეინახე.
- 22რადგან სიცოცხლეა იგი მისი მპოვნელისთვის და კურნებაა მისი სხეულისთვის.
- 23ყველაფერზე მეტად დაიცავი შენი გული, რადგან მისგან მოედინებიან სიცოცხლის წყაროები.
- 24მოიცილე მზაკვრობა ბაგიდან და უკუღმართი საუბარი განიშორე.
- 25წინ იყურონ შენმა თვალებმა და პირდაპირი იყოს შენი მზერა შენს წინაშე.
- 26მოასწორე შენი ფეხის ბილიკი და ყველა შენი გზა განმტკიცდება.
- 27ნურც მარჯვნივ გადაუხვევ, ნურც მარცხნივ; განაშორე ფეხი ბოროტებას.
იტვირთება შემდეგი თავი