ფსალმუნები — ახალი გადამუშავებული გამოცემა 2015
იტვირთება წინა თავი
თავი 117
- 1მადლობდეთ უფალს, რადგან კეთილია, რადგან უკუნისამდეა წყალობა მისი.
- 2თქვას ისრაელმა: მართლაც უკუნისამდეა წყალობა მისი.
- 3თქვას აჰარონის სახლმა: მართლაც უკუნისამდეა წყალობა მისი.
- 4თქვან უფლის მოშიშებმა: მართლაც უკუნისამდეა წყალობა მისი.
- 5სივიწროვიდან ვუხმობდი უფალს, სიფართოვით მიპასუხა უფალმა.
- 6უფალი ჩემთანაა - არ მეშინია, რას მიზამს კაცი?
- 7უფალი ჩემთანაა, ჩემს შემწეთა შორის, ამიტომ ვიზეიმებ ჩემს მტრებზე.
- 8უკეთესია უფალს შეაფარო თავი, ვიდრე ადამიანზე დაიმედდე.
- 9უკეთესია უფალს შეაფარო თავი, ვიდრე მთავრებზე დაიმედდე.
- 10ხალხნი ყოველნი გარს შემომერტყნენ - უფლის სახელით ამოვწყვეტ მათ.
- 11გარს შემომერტყნენ, გარემომიცვეს - უფლის სახელით ამოვწყვეტ მათ.
- 12გარს შემომერტყნენ ფუტკრებივით; აალებული ძეძვივით აბრიალდნენ - უფლის სახელით ამოვწყვეტ მათ.
- 13ძლიერად მკრეს ხელი ძირს დასაცემად, მაგრამ უფალი შემეწია მე.
- 14ჩემი ძალა და სიმღერაა უფალი, ხსნა არის იგი ჩემთვის.
- 15სიმღერისა და ხსნის ყიჟინაა მართალთა კარვებში: ძლევამოსილია უფლის მარჯვენა.
- 16შემართულია უფლის მარჯვენა, ძლიერებას ავლენს უფლის მარჯვენა.
- 17არ მოვკვდები, არამედ ვიცოცხლებ და ვილაპარაკებ უფლის საქმეებზე.
- 18მკაცრად დამსაჯა უფალმა, მაგრამ სიკვდილს არ მიმცა.
- 19გამიღეთ სიმართლის კარიბჭენი, შევალ და მადლობას მივაგებ უფალს,
- 20ეს არის კარიბჭე უფლისა, მართლები შევლენ შიგ.
- 21გადიდებ შენ, რადგან მიპასუხე და ჩემი ხსნა გახდი.
- 22ქვა, დაწუნებული მშენებლების მიერ, ქვაკუთხედად იქცა.
- 23უფლისგან მოხდა ეს და საოცარია ჩვენს თვალში.
- 24ეს არის დღე, რომელიც უფალმა შექმნა, ვილხინოთ და ვიმხიარულოთ მასში.
- 25გევედრებით უფალო, გვიხსენი! გევედრებით უფალო, წარმატება მოგვეცი!
- 26კურთხეულია უფლის სახელით მომავალი; გაკურთხებთ უფლის სახლიდან!
- 27უფალი ღმერთია და ის გვაძლევს სინათლეს; საბელით მიაბით სადღესასწაულო მსხვერპლი სამსხვერპლოს რქებზე.
- 28ჩემი ღმერთი ხარ შენ და გადიდებ; ღმერთო ჩემო, აგამაღლებ შენ.
- 29მადლობდეთ უფალს, რადგან კეთილია, რადგან უკუნისამდეა წყალობა მისი!
იტვირთება შემდეგი თავი