ფსალმუნები — ახალი გადამუშავებული გამოცემა 2015
იტვირთება წინა თავი
თავი 134
- 1ადიდეთ უფლის სახელი, ადიდეთ იგი, მსახურნო უფლისა!
- 2უფლის სახლში რომ დგახართ, ჩვენი ღმერთის სახლის ეზოებში.
- 3ადიდეთ უფალი, რადგან კეთილია; მის სახელს უგალობეთ, რადგან საამურია ის.
- 4რადგან იაკობი ამოირჩია უფალმა, ისრაელი - თავის კუთვნილებად.
- 5რადგან ვიცი, რომ დიდია უფალი; ჩვენი უფალი ყველა ღმერთზე დიდია.
- 6რასაც მოისურვებს, ყოველივეს აკეთებს უფალი, ცაში და დედამიწაზე, ზღვაში თუ წყლის სიღრმეებში.
- 7ქვეყნის კიდეებიდან ამოჰყავს ღრუბლები, ელვას წვიმად აქცევს და ქარი გამოჰყავს თავისი საცავებიდან.
- 8მან მოსრა ეგვიპტის პირმშონი - ადამიანიდან პირუტყვამდე.
- 9ნიშნები და სასწაულები მოავლინა შენ შორის ეგვიპტევ, ფარაონსა და ყველა მის მსახურზე.
- 10მოსრა მრავალი ერი და დახოცა ძლიერი მეფენი.
- 11ამორელთა მეფე სიხონი, ბაშანის მეფე ყოგი და ქანაანის ყველა სამეფო.
- 12მან მისცა მათი მიწა სამკვიდროდ, მემკვიდრეობად გადასცა თავის ხალხს, ისრაელს.
- 13უფალო, მარადიულია შენი სახელი და თაობიდან თაობამდეა შენი ხსენება.
- 14რადგან განიკითხავს თავის ხალხს უფალი და შეიბრალებს თავის მსახურთ.
- 15ვერცხლი და ოქროა ხალხთა კერპები, ადამიანის ნახელავი.
- 16პირი აქვთ და ვერ ლაპარაკობენ, თვალები აქვთ და ვერ ხედავენ.
- 17ყურები აქვთ და ვერ ისმენენ, არც სუნთქვა გააჩნია მათ პირებს.
- 18მათ დაემსგავსებიან მათი გამკეთებელნი, ყველა, ვინც მათზეა მინდობილი.
- 19ისრაელის სახლო, აკურთხე უფალი; აჰარონის სახლო, აკურთხე უფალი!
- 20ლევის სახლო, აკურთხე უფალი; უფლის მოშიშნო, აკურთხეთ უფალი!
- 21კურთხეულ იყოს სიონიდან უფალი, რომელიც იერუსალიმში მკვიდრობს. ადიდეთ უფალი!
იტვირთება შემდეგი თავი