ფსალმუნები — ახალი გადამუშავებული გამოცემა 2015

თავი 23

1. 1
   უფლისა არის ქვეყნიერება და სავსება მისი, სამყარო და მკვიდრნი მისი.
2. 2
   რადგან ზღვებზე დააფუძნა მან იგი და მდინარეებზე გაამყარა იგი.
3. 3
   ვინ ავა უფლის მთაზე ან ვინ დადგება მის წმიდა ადგილზე?
4. 4
   ვისაც ხელები სუფთა აქვს და გული სპეტაკი, ვინც ამაო კერპებს არ წაპოტინებია და ყალბად არ დაუფიცია,
5. 5
   ის მიიღებს კურთხევას უფლისგან და გამართლებას თავისი მხსნელი ღმერთისგან.
6. 6
   ასეთია თაობა მაძიებელთა, ვინც ეძებს შენს სახეს, ღმერთო იაკობისა!
7. 7
   მაღლა ასწიეთ თავები კარიბჭეებო და აიწიეთ კარნო მარადნო, რომ შემოვიდეს დიდების მეფე!
8. 8
   ვინ არის დიდების მეფე? უფალი მტკიცე და ძლიერი, უფალი - ომში ძლევამოსილი.
9. 9
   მაღლა ასწიეთ თავები კარიბჭეებო და იყავით ამაღლებულნი კარნო მარადნო, რომ შემოვიდეს დიდების მეფე!
10. 10
    ვინ არის მეფე დიდებისა? უფალი ცაბაოთი, ის არის მეფე დიდებისა.