ფსალმუნები — ახალი გადამუშავებული გამოცემა 2015
იტვირთება წინა თავი
თავი 24
- 1შენკენ აღვაპყარ სული ჩემი უფალო.
- 2ღმერთო ჩემო! შენზე ვარ მონდობილი; ნუ შევრცხვები და ნუ იზეიმებს მტერი ჩემზე.
- 3ნურც შერცხვება ნურავინ, ვინც შენ გენდობა; ამაოდ შემცოდველნი კი შერცხვნენ.
- 4შენი გზები შემაცნობინე უფალო და მასწავლე შენი ბილიკები.
- 5გამიძეხ შენი ჭეშმარიტებით და მასწავლე, რადგან შენ ხარ ჩემი ხსნის ღმერთი; გამუდმებით შენ გენდობი.
- 6გაიხსენე, უფალო, შენი სიყვარული და წყალობა, რადგან საუკუნოა ისინი.
- 7ჩემი სიჭაბუკის ცოდვებსა და ბრალს ნუ გაიხსენებ; შენი გულმოწყალებით, შენი სიკეთით გამიხსენე უფალო.
- 8კეთილი და მართალია უფალი, ამიტომ აყენებს გზაზე ცოდვილებს.
- 9თავმდაბალთ სამართალში მიუძღვის და თავის გზას ასწავლის მორჩილთ.
- 10უფლის ყველა გზა წყალობა და ჭეშმარიტებაა მისი აღთქმებისა და მცნებების შემნახველთათვის.
- 11შენი სახელისთვის შემინდე დანაშაული, უფალო, რადგან დიდია იგი.
- 12ვინ არის კაცი მოშიში უფლისა? მას უჩვენებს გზას, რომელიც უნდა აირჩიოს.
- 13სიკეთეში იცხოვრებს იგი და მისი შთამომავლობა დაიმკვიდრებს ქვეყანას.
- 14საიდუმლო უფლისა მისი მოშიშებისთვისაა და თავის აღთქმას აუწყებს მათ.
- 15მუდამ უფლისკენაა მიმართული ჩემი თვალები, ის იხსნის ჩემს ფეხებს მახისგან.
- 16გადმომხედე და შემიწყალე, ვინაიდან მარტოდმარტო ვარ და ჩაგრული.
- 17მწუხარება გამიმრავლდა გულში, მიხსენი ჩემი გაჭირვებიდან.
- 18შეხედე ჩემს უბედურებას და ტანჯვას და მაპატიე ჩემი ყველა შეცოდება.
- 19შეხედე, როგორ მომრავლდნენ ჩემი მტრები და საშინელი სიძულვილით შემიძულეს მე.
- 20დაიფარე ჩემი სიცოცხლე და გამომიხსენი, ნუმც შევრცხვები, რადგან შენში ვპოვე თავშესაფარი.
- 21უბიწოებამ და სიწრფელემ დამიფაროს მე, ვინაიდან შენ მოგელი.
- 22უფალო, გამოისყიდე ისრაელი მისი ყოველი გასაჭირიდან.
იტვირთება შემდეგი თავი