მათეს სახარება — ახალი აღთქმა, სტოკჰოლმი 1985
იტვირთება წინა თავი
თავი 28
- 1შაბათი რომ გავიდა, კვირის პირველი დღის განთიადზე მოვიდნენ სამარხის სანახავად მარიამ მაგდალინელი და სხვა მარიამი.
- 2და აი, მოხდა დიდი მიწისძვრა, ვინაიდან ციდან ჩამოსული უფლის ანგელოზი მოვიდა, გადააგორა ლოდი და დაჯდა ზედ.
- 3მისი შესახედაობა ელვასავით იყო და მისი ტანისამოსი თოვლივით სპეტაკი.
- 4მისგან შიშით შეირყნენ მცველები და მკვდრებივით გახდნენ.
- 5ანგელოზმა კი მიმართა დედაკაცებს და უთხრა: ნუ გეშინიათ, ვინაიდან ვიცი, რომ ჯვარცმულ იესოს ეძებთ.
- 6აქ არ არის, ვინაიდან აღდგა, როგორც თქვა. მოდით, ნახეთ ადგილი სადაც იწვა.
- 7მალე წადით და უთხარით მის მოწაფეებს, რომ იგი აღდგა მკვდრეთით და, აი, თქვენს წინ მიდის გალილეისკენ; იქ ნახავთ მას. აი, გითხარით თქვენ.
- 8აჩქარებით წასულნი სამარხიდან შიშით და დიდი სიხარულით გარბოდნენ, რომ ეცნობებინათ მისი მოწაფეებისათვის.
- 9და აი, იესო შეხვდა მათ და უთხრა: გიხაროდეთ! ისინი კი მოვიდნენ, ფეხებზე მოეხვივნენ და თაყვანი სცეს მას.
- 10მაშინ უთხრა მათ იესომ: ნუ გეშინიათ, წადით და აუწყეთ ჩემს ძმებს, რომ წავიდნენ გალილეას, და იქ მნახავენ მე.
- 11როცა ისინი მიდიოდნენ, აი, მცველთაგან ზოგიერთები მივიდნენ ქალაქში და განუცხადეს მღვდელმთავრებს ყოველივე, რაც მოხდა.
- 12ისინი შეიკრიბნენ უხუცესებთან ერთად, მოითათბირეს და დიდძალი ვერცხლი მისცეს ჯარისკაცებს
- 13და უთხრეს: თქვით, მისი მოწაფეები მოვიდნენ ღამით და მოიპარეს იგი, როცა ჩვენ გვეძინა.
- 14და თუ ამას გაიგონებს მმართველი, ჩვენ დავარწმუნებთ მას და დაგიხსნით უსიამოვნებისაგან.
- 15მათ კი აიღეს ვერცხლი და ისე მოიქცნენ, როგორც დაარიგეს. და ეს სიტყვა გავრცელდა იუდეველებს შორის დღევანდელ დღემდე.
- 16ხოლო თერთმეტი მოწაფე წავიდა გალილეას იმ მთაზე, რომელიც იესომ დაუთქვა მათ.
- 17და რომ ნახეს იგი, თაყვანი სცეს, ხოლო ზოგიერთი დაეჭვდა.
- 18და მიუახლოვდა იესო, ელაპარაკა მათ და უთხრა: მოცემული მაქვს მე მთელი ძალაუფლება ზეცაში და დედამიწაზე.
- 19ამიტომ წადით და გახადეთ მოწაფეებად ყველა ხალხი, მონათლეთ ისინი სახელითა მამისათა და ძისათა და სულისა წმიდისათა.
- 20ასწავლეთ მათ ყოველივეს დაცვა, რაც მე გამცნეთ. და აი, მე თქვენთან ვარ ყველა დღეს წუთისოფლის აღსასრულამდე. ამინ.