4 მეფეთა — ახალი გადამუშავებული გამოცემა 2015

თავი 15

1. 1
   იერობყამის, ისრაელის მეფის ოცდამეშვიდე წელს გამეფდა ყაზარია, იუდას მეფის, ამაციაჰუს ძე.
2. 2
   თექვსმეტი წლისა იყო როცა გამეფდა და ორმოცდათორმეტი წელი იმეფა იერუსალიმში. დედამისი იყო იექალიაჰუ, იერუსალიმიდან.
3. 3
   სწორად იქცეოდა უფლის თვალში, ისევე როგორც მამამისი ამაციაჰუ.
4. 4
   ოღონდ მაღლობები არ იყო გაუქმებული: ხალხი ისევ სწირავდა და აკმევდა მაღლობებზე.
5. 5
   დააწყლულა უფალმა მეფე და სიკვდილამდე კეთროვანი იყო. ცხოვრობდა მეფე თავისუფლად, მისთვის გამოყოფილ სახლში. იოთამი, მეფის ძე, განაგებდა სახლეულს და განსჯიდა ქვეყანაში მცხოვრებ ხალხს.
6. 6
   ყაზარიას დანარჩენი საქმენი, ყველაფერი, რაც მოიმოქმედა, განა იუდას მეფეთა მატიანეს წიგნში არაა აღწერილი?
7. 7
   განისვენა ყაზარიამ და დამარხეს იგი თავის მამებთან დავითის ქალაქში. მის ნაცვლად მისი ძე, იოთამი გამეფდა.
8. 8
   ყაზარიას, იუდას მეფის ოცდამეთვრამეტე წელს სამარიაში ისრაელზე ზაქარია იერობყამის ძე გამეფდა და ექვსი თვე იმეფა.
9. 9
   ბოროტად იქცეოდა უფლის თვალში, როგორც მისი მამები იქცეოდნენ; არ განრიდებია იერობყამ ნაბატის ძის ცოდვებს, რომლითაც ისრაელი ცდუნდა.
10. 10
    შეთქმულება მოუწყო შალუმმა, იაბეშის ძემ, ხალხის წინ განგმირა იგი და გამეფდა მის ნაცვლად.
11. 11
    ზაქარიას დანარჩენი საქმენი განა ისრაელის მეფეთა მატიანეს წიგნში არაა აღწერილი?
12. 12
    აი, უფლის სიტყვა, რომელიც გამოუცხადა მან იეჰუს: "მეოთხე თაობამდე ისხდებიან შენი ძენი ისრაელის ტახტზე”. ასეც მოხდა.
13. 13
    შალუმ იაბეშის ძე გამეფდა იუდას მეფის, ყუზიას ოცდამეცხრამეტე წელს და ერთი თვე იმეფა სამარიაში.
14. 14
    წამოვიდა მენახემ გადის ძე თირცადან და მივიდა სამარიას. განგმირა შალუმ იაბეშის ძე სამარიაში, მოკლა და მის ნაცვლად გამეფდა.
15. 15
    შალუმის დანარჩენი საქმენი და მისი შეთქმულების ამბავი, რომელიც მან მოაწყო, ისრაელის მეფეთა მატიანეს წიგნშია ჩაწერილი.
16. 16
    მაშინ შემუსრა მენახემმა თიფსახი და ყველა მასში მყოფი. მოსრა თირცადას საზღვრები, რადგან არ გააღეს კარიბჭეები და შუაზე გააპო ყველა ორსული ქალი.
17. 17
    იუდას მეფის, ყაზარიას, ოცდამეცხრამეტე წელს გამეფდა მენახემ გადის ძე ისრაელზე; ათი წელი იმეფა სამარიაში.
18. 18
    ბოროტად იქცეოდა უფლის თვალში, არ განრიდებია მთელი თავისი სიცოცხლე იერობყამ ნაბატის ძის ცოდვებს, რომლითაც ისრაელი ცდუნდა.
19. 19
    წამოვიდა ფულა, აშურის მეფე, ქვეყნის წინააღმდეგ და მისცა მენახემმა ფულას ათასი ტალანტი ვერცხლი, რომ ყოფილიყო მისი შემწეობის ქვეშ და განემტკიცებინა თავისი მეფობა.
20. 20
    გამოსძალა მენახემმა ეს ფული ისრაელს, ყველა შეძლებულს - კაცზე ორმოცდაათი შეკელი, აშურის მეფისთვის მისაცემად. უკან გაბრუნდა აშურის მეფე, აღარ დარჩენილა იქ, იმ ქვეყანაში.
21. 21
    მენახემის დანარჩენი საქმენი, ყველაფერი, რაც მოიმოქმედა, ისრაელის მეფეთა მატიანეს წიგნშია აღწერილი.
22. 22
    განისვენა მენახემმა თავის მამებთან, მის ნაცვლად მისი ძე, ფეკახია გამეფდა.
23. 23
    იუდას მეფის, ყაზარიას ორმოცდამეათე წელს გამეფდა ფეკახია მენახემის ძე ისრაელზე სამარიაში და ორი წელი იმეფა.
24. 24
    ბოროტად იქცეოდა უფლის თვალში, არ განრიდებია იერობყამ ნაბატის ძის ცოდვებს, რომლითაც ისრაელი ცდუნდა.
25. 25
    შეთქმულება მოუწყო ფეკახ რემალიაჰუს ძემ, მისმა სარდალმა და განგმირა იგი სამარიაში, მეფის სასახლის დარბაზში, არგობსა და არიესთან ერთად, თან ორმოცდაათი გილყადელი კაცი ახლდა; მოკლა იგი და მის ნაცვლად გამეფდა.
26. 26
    ფეკახიას დანარჩენი საქმენი, ყველაფერი, რაც მოიმოქმედა, ისრაელის მეფეთა მატიანეს წიგნშია ჩაწერილი.
27. 27
    იუდას მეფის, ყაზარიას ორმოცდამეთორმეტე წელს გამეფდა ფეკახ რემალიაჰუს ძე ისრაელზე სამარიაში და იმეფა ოცი წელი.
28. 28
    ბოროტად იქცეოდა უფლის თვალში, არ განრიდებია იერობყამ ნაბატის ძის ცოდვებს, რომლითაც ისრაელი ცდუნდა.
29. 29
    ისრაელის მეფის, ფეკახის დღეებში მოვიდა თიგლათფილესერი, აშურის მეფე, აიღო ყიონი, აბელ-ბეთ-მაყაქა, იანოხი, კედეში, ხაცორი, გილყადი და გალილეა, მთელი ნაფთალის ტომის ქვეყანა და ხალხი აშურში წაიყვანა ტყვედ.
30. 30
    შეთქმულება მოუწყო ჰოშეაყ ელიას ძემ ფეკახ რემალიაჰუს ძეს, განგმირა, მოკლა იგი და გამეფდა მის ნაცვლად იოთამ ყუზიას ძის მეოცე წელს.
31. 31
    ფეკახის დანარჩენი საქმენი, ყველაფერი, რაც გააკეთა, განა ისრაელის მეფეთა მატიანეს წიგნში არაა ჩაწერილი?
32. 32
    ისრაელის მეფის, ფეკახ რემალიაჰუს ძის მეფობის მეორე წელს გამეფდა იოთამ ყუზიას ძე, იუდას მეფე.
33. 33
    ოცდახუთი წლის იყო, როცა გამეფდა და თექვსმეტი წელი იმეფა იერუსალიმში. დედამისი იყო იერუშა, ცადოკის ასული.
34. 34
    სწორად იქცეოდა უფლის თვალში, როგორც მამამისი, ყუზია იქცეოდა.
35. 35
    ოღონდ მაღლობები არ გაუქმებულა და ხალხი ისევ მაღლობებზე სწირავდა და აკმევდა საკმეველს. იოთამმა აღადგინა უფლის სახლის ზედა კარიბჭე.
36. 36
    იოთამის დანარჩენი საქმენი, ყველაფერი, რაც მოიმოქმედა, განა იუდას მეფეთა მატიანეს წიგნში არაა ჩაწერილი?
37. 37
    იმ დღეებში გაგზავნა უფალმა იუდას წინააღმდეგ რეცინი, არამის მეფე და ფეკახ რემალიაჰუს ძე.
38. 38
    განისვენა იოთამმა თავის მამებთან და მამამისის, დავითის ქალაქში დაიმარხა. მის ნაცვლად მისი ძე, ახაზი გამეფდა.