ფსალმუნები — ახალი გადამუშავებული გამოცემა 2015

თავი 104

1. 1
   მადლობდეთ უფალს, მოუხმეთ მის სახელს, აუწყეთ ერებს მისი საქმეები.
2. 2
   უმღერეთ მას, ხოტბა შეასხით, ილაპარაკეთ მის ყველა სასწაულზე.
3. 3
   იამაყეთ მისი წმიდა სახელით, გამხიარულდეს უფლის მაძიებელთა გული.
4. 4
   ეძიეთ უფალი და მისი ძლიერება, გამუდმებით ეძიეთ მისი სახე,
5. 5
   გაიხსენეთ მისი საქმეები, ნიშნები, რომლებიც მოიმოქმედა და მისი ბაგის განკითხვანი.
6. 6
   შთამომავალნო აბრაჰამისა, მისი მსახურისა, ძენო იაკობისა, მისნო რჩეულნო.
7. 7
   ის არის უფალი, ჩვენი ღმერთი, მთელ ქვეყნიერებაზეა მისი სამართალი.
8. 8
   საუკუნოდ ახსოვს თავისი აღთქმა, სიტყვა, ნაბრძანები ათასი თაობისთვის.
9. 9
   რომელიც შეკრა აბრაჰამთან; და თავისი ფიცი - ისაკთან.
10. 10
    დაუდგინა იგი წესად იაკობს და სამუდამო აღთქმად - ისრაელს.
11. 11
    უთხრა: "შენ მოგცემ ქანაანის ქვეყანას, როგორც წილს შენი მემკვიდრეობისას”.
12. 12
    როცა თითებზე ჩამოსათვლელნი იყვნენ ისინი, ცოტანი იყვნენ და ხიზნობდნენ იქ,
13. 13
    ერთი ქვეყნიდან მეორეში გადადიოდნენ, ერთი სამეფოდან - სხვა ხალხში.
14. 14
    არავის ანებებდა მათ დაჩაგვრას და მათ გამო აფრთხილებდა მეფეებს:
15. 15
    "არ შეეხოთ ჩემს ცხებულებს და ჩემს წინასწარმეტყველებს არ უბოროტოთ”.
16. 16
    შიმშილს მოუხმო დედამიწაზე და ყოველი სახსარი პურისა შემუსრა.
17. 17
    გაგზავნა მათ წინ კაცი; მონად გაიყიდა იოსები.
18. 18
    გატანჯეს ბორკილებით მისი ფეხები, რკინა მისწვდა მის სულს.
19. 19
    ვიდრე ასრულდებოდა მისი ნათქვამი, უფლის სიტყვამ გამობრძმედა იგი.
20. 20
    გაგზავნა მეფემ და გამოიხსნა, ხალხთა განმგებელმა გაათავისუფლა იგი.
21. 21
    დააყენა თავისი სახლის ბატონად და მთელი თავისი მონაგარის განმგებლად.
22. 22
    რათა თავისი სურვილისამებრ მოქცეოდა მის თავადებს და განებრძნო მისი მოხუცებულნი.
23. 23
    მაშინ მოვიდა ისრაელი ეგვიპტეში და ქამის ქვეყანაში გადასახლდა იაკობი.
24. 24
    ფრიად გაამრავლა ღმერთმა თავისი ხალხი და მეტად გააძლიერა მათ მტრებზე.
25. 25
    მოაქცია მათი გული უფლის ხალხის შესაძულებლად, მისი მსახურებისთვის მზაკვრობის განსაზრახად.
26. 26
    გაგზავნა მოსე, თავისი მსახური და აჰარონი, რომელიც ამოირჩია.
27. 27
    მათ აჩვენეს ხალხს მისი ნიშნები და სასწაულები ქამის ქვეყანაში.
28. 28
    მიავლინა წყვდიადი და დააბნელა, არ შეწინააღმდეგებიან მის სიტყვას.
29. 29
    სისხლად გადააქცია მათი წყლები და გაუწყვიტა თევზი.
30. 30
    ბაყაყებით აავსო მათი ქვეყანა, მეფეთა შიდა ოთახებიც კი.
31. 31
    თქვა და მოვიდა ბუზანკალი, კოღომ აავსო მთელი მათი მხარე.
32. 32
    წვიმის მაგიერ სეტყვა გამოუგზავნა, ალმოდებული ცეცხლი - მათ ქვეყანას.
33. 33
    მოსრა მათი ვაზი და ლეღვი; დალეწა ხეები მათ საზღვრებში.
34. 34
    თქვა და მოვიდა კალია, მუხლუხო აურაცხელი.
35. 35
    გადაჭამეს მთელი ბალახი მათ ქვეყანაში და მთელი ნაყოფი - მათი მინდვრისა.
36. 36
    მოსრა ყოველი პირმშო მათ ქვეყანაში, პირველნაყოფი მთელი მათი ძლიერებისა.
37. 37
    ოქრო-ვერცხლით გამოიყვანა ისინი და არავინ იყო უძლური მათ ტომებში.
38. 38
    უხაროდა ეგვიპტეს მათი გამოსვლა, რადგან მათმა შიშმა შეიპყრო ის.
39. 39
    გადააფარა ღრუბელი მათ საფრად და ცეცხლი - ღამის გასანათებლად.
40. 40
    ითხოვეს და მწყერი გაუგზავნა, ზეციური პურით გააძღო ისინი.
41. 41
    გაჰკვეთა კლდე და წყალი გადმოდინდა, ნაკადულად მოედინებოდა უდაბნოში.
42. 42
    რადგან გაიხსენა თავისი წმიდა სიტყვა, თავისი მსახურის, აბრაჰამის მიმართ.
43. 43
    სიხარულით გამოიყვანა თავისი ხალხი, ზარ-ზეიმით - თავისი რჩეულნი.
44. 44
    მისცა მათ წარმართთა ქვეყნები და ნაჯაფი ერებისა დაიმკვიდრეს მათ.
45. 45
    რათა შეესრულებინათ მისი წესები და დაეცვათ მისი კანონები. ალელუია!