ფსალმუნები — ახალი გადამუშავებული გამოცემა 2015
იტვირთება წინა თავი
თავი 142
- 1ნუ შეხვალ სამართალში შენს მსახურთან, რადგან ვერ გამართლდება შენ წინაშე ვერც ერთი კაცი.
- 2რადგან დევნა მტერმა ჩემი სული, მიწაზე დაანარცხა ჩემი სიცოცხლე, ბნელეთში დამსვა დიდი ხნის მკვდარივით.
- 3ამიტომ სული შემიწუხდა და გული შეძრწუნდა ჩემში.
- 4ვიხსენებ ადრინდელ დღეებს, მივტირი ყოველ შენს საქმეს და ვფიქრობ შენი ხელის ნამოქმედარზე.
- 5შენკენ ვიწვდი ხელებს, გამოფიტული მიწასავით მოსწყურდი ჩემს სულს.
- 6მალე მიპასუხე უფალო, გაილია ჩემი სული. ნუ დაფარავ შენს სახეს ჩემგან, თორემ საფლავში ჩასულს დავემგვანები.
- 7მომასმენინე დილდილობით შენი წყალობა, ვინაიდან შენ გენდობი. მაუწყე, რომელი გზით ვიარო, რადგან შენკენ აღვაპყარ ჩემი სული.
- 8მიხსენი ჩემს მტერთაგან უფალო; შენთან ვაფარებ თავს.
- 9შენი ნების შესრულება მასწავლე, რადგან ჩემი ღმერთი ხარ შენ. შენი კეთილი სული წამიძღვეს სწორ გზაზე.
- 10უფალო, შენი სახელის გულისთვის შემინარჩუნე სიცოცხლე. შენი სიმართლით გამოიყვანე გაჭირვებიდან ჩემი სული.
- 11შენი წყალობით მოსპე ჩემი მტრები, დაღუპე ყოველი მჩაგვრელი ჩემი სულისა, რადგან მე შენი მსახური ვარ.
იტვირთება შემდეგი თავი