ფსალმუნები — ახალი გადამუშავებული გამოცემა 2015
იტვირთება წინა თავი
თავი 144
- 1აღგამაღლებ ღმერთო, მეფევ ჩემო და უკუნითი უკუნისამდე ვაკურთხებ შენს სახელს.
- 2ყოველდღე გაკურთხებ შენ და უკუნითი უკუნისამდე შევაქებ შენს სახელს.
- 3დიდია უფალი და საქებარია ფრიად, ჩაუწვდომელია მისი სიდიადე.
- 4თაობა თაობას შეუქებს შენს საქმეებს და შენს სიძლიერეს აუწყებენ.
- 5შენი მშვენების სიდიადესა და ბრწყინვალებაზე, შენს საოცარ საქმეებზე ვილაპარაკებ.
- 6ისინი შენი საშიში საქმეების სიძლიერეზე ილაპარაკებენ, მე კი შენს სიდიადეს ვაუწყებ.
- 7გაიხსენებენ შენს მრავალმოწყალებას და სიხარულით შესძახებენ შენი სიმართლის გამო.
- 8მპატიებელი და შემბრალეა უფალი, სულგრძელი და დიდად მოწყალე.
- 9ყველას მიმართ კეთილია უფალი და მისი წყალობა მის ყველა ქმნილებაზეა.
- 10უფალო, შენ განგადიდებს ყოველი შენი ქმნილება და გაკურთხებენ შენი წმიდანები.
- 11შენი სამეფოს დიდებასა და შენს სიძლიერეზე ილაპარაკებენ.
- 12რათა ამცნონ ადამის ძეთ შენი ძლევამოსილი საქმეები და შენი მეფობის ბრწყინვალე სიდიადე.
- 13შენი სამეფო მარადიული სამეფოა და შენი მმართველობა თაობიდან თაობებში ვრცელდება.
- 14ყველა დაცემულის შემწეა უფალი და წამომყენებელი ყველა წელში მოხრილისა.
- 15ყველას თვალი შენ შემოგცქერის, შენ აძლევ მათ საზრდოს თავის დროზე.
- 16გაშლი ხელს და აკმაყოფილებ ყოველი სულდგმულის საჭიროებას.
- 17მართალია უფალი ყველა თავის გზაზე და მოწყალეა ყველა თავის საქმეში.
- 18ახლოსაა უფალი ყველასთან, ვინც მას მოუხმობს, ყოველთან, ვინც ჭეშმარიტებით მოუხმობს მას.
- 19მის მოშიშთა სურვილს ასრულებს, მათ ღაღადისს ისმენს და იხსნის მათ.
- 20ყველა მის მოყვარულს იცავს უფალი და სპობს ყველა ბოროტს.
- 21ჩემი პირით განვადიდებ უფალს; აკურთხოს ყოველმა ხორციელმა მისი წმიდა სახელი უკუნითი უკუნისამდე!
იტვირთება შემდეგი თავი