ფსალმუნები — ახალი გადამუშავებული გამოცემა 2015
იტვირთება წინა თავი
თავი 30
- 1უფალო, შენში ვეძებ თავშესაფარს, ნურც შევრცხვენილვარ ნურასოდეს; შენი სიმართლით გამომიხსენი.
- 2ყური მომაპყარ, იჩქარე ჩემი გადარჩენა, თავშესაფარი კლდე იყავ ჩემთვის, სიმაგრე ჩემს დასახსნელად.
- 3რადგან ჩემი კლდე და სიმაგრე ხარ; შენი სახელის გულისთვის მიჩვენე გზა და გამიძეხი.
- 4გამომიყვანე მახიდან, რომელიც ჩუმად დამიგეს, რადგან შენ ხარ სიმაგრე ჩემი.
- 5შენს ხელს ვანდობ ჩემს სულს. შენ დამიხსენი, ო, უფალო, ღმერთო ჭეშმარიტო.
- 6შევიძულე ამაო კერპთა თაყვანისმცემელნი და უფალს მივენდე.
- 7ვილხენ და ვიმხიარულებ შენი წყალობით, რადგან იხილე ჩემი გაჭირვება და იცი ჩემი ტანჯვა.
- 8მტრის ხელთ არ ჩამაგდე, ფართოდ დაამკვიდრე ფერხნი ჩემნი.
- 9შემიწყალე, უფალო, რადგან მიჭირს, წუხილით დამისუსტდა თვალი, სამშვინველი და სხეული.
- 10რადგან ნაღველში გაილია ჩემი სიცოცხლე და გლოვაში - წლები. ჩემი ცოდვების გამო შეირყა ჩემი ძალა და ძვლები ჩემი - გამოშრა.
- 11შერცხვენილი შევიქენი, ყველა ჩემი მტრის გამო ჩემი მეზობლების წინაშე და საფრთხობელად - ნაცნობთათვის; ამიტომ გამირბის, ვინც მხედავს ქუჩაში.
- 12მკვდარივით ამომიგდეს გულიდან; დამსხვრეულ ჭურჭელს დავემსგავსე.
- 13რადგან მესმოდა ცილისწამება მრავალთა, შიში ყოველი მხრიდან, ისინი შეითქვნენ ჩემს წინააღმდეგ, ჩემი სულის ამოხდა განიზრახეს.
- 14მე კი, უფალო, შენზე ვარ მონდობილი, ვთქვი: შენა ხარ ჩემი ღმერთი.
- 15შენს ხელთაა ჩემი დრო. მიხსენი ჩემი მდევნელებისა და მტრების ხელთაგან.
- 16გამოუბრწყინე შენი სახე შენს მსახურს, გადაარჩინე შენი წყალობით.
- 17უფალო, ნუმც შევრცხვენილვარ, რადგან შენ მოგიხმობ; ბოროტნი კი შერცხვნენ და დადუმდნენ საფლავში.
- 18დაე, დამუნჯდნენ ცრუ ბაგენი, რომლებიც ამპარტავნულად ლაპარაკობენ მართალზე - ქედმაღლობით და სიძულვილით.
- 19რაოდენ დიდია სიკეთე შენი, რომელსაც შენს მოშიშთათვის ინახავ, შენში თავშესაფრის მძებნელთ რომ განუმზადე, ადამის ძეთა წინაშე.
- 20შენ იფარავ მათ შენი პირის საფარველქვეშ ადამიანთა ხრიკებისგან, იცავ მათი ენით მომხდარი დავიდარაბისგან.
- 21კურთხეულ იყოს უფალი, რადგან ალყაშემორტყმულ ქალაქში მომივლინა თავისი სიკეთე.
- 22ვფიქრობდი ჩემი ძრწოლისას: "მოკვეთილი ვარ შენს თვალთაგან”, მაგრამ შენ ისმინე ჩემი მუდარის ხმა, როცა შემოგღაღადებდი.
- 23შეიყვარეთ უფალი, ღვთისნიერნო მისნო; ერთგულს იცავს უფალი და მრავალგზის მიუზღავს ამაყებს.
- 24გამხნევდით და გული გაიმაგრეთ ყველამ, ვისაც უფლის მოლოდინი გაქვთ.
იტვირთება შემდეგი თავი