ფსალმუნები — ახალი გადამუშავებული გამოცემა 2015
იტვირთება წინა თავი
თავი 33
- 1განვადიდებ უფალს ყოველჟამს, გამუდმებით იქნება მისი ქება ჩემს ბაგეებზე.
- 2უფლით იქადის ჩემი სული; ისმინონ თავმდაბლებმა და გაიხარონ.
- 3ადიდეთ უფალი ჩემთან ერთად; ერთად ავამაღლოთ მისი სახელი.
- 4ვეძებდი უფალს და მიპასუხა, დამიხსნა ყველა ჩემი შიშისგან.
- 5უმზირეთ მას და გაბრწყინდით, არასოდეს შერცხვება თქვენი სახეები.
- 6აგერ ღარიბმა მოუხმო და მოისმინა უფალმა, დაიხსნა ყველა მისი გასაჭირისგან.
- 7დაიბანაკებს უფლის ანგელოზი მის მოშიშთა ირგვლივ და იხსნის მათ.
- 8იგემეთ და ნახეთ, რომ კარგია უფალი; ბედნიერია კაცი, ვინც მას აფარებს თავს.
- 9გეშინოდეთ უფლის, წმიდანნო მისნო, რადგან არაფერი მოაკლდება მის მოშიშთ.
- 10ახალგაზრდა ლომები იტანჯებიან და შიმშილობენ, უფლის მაძიებლებს კი არავითარი სიკეთე არ მოაკლდებათ.
- 11მოდით შვილებო, მომისმინეთ: უფლის მოშიშებას გასწავლით თქვენ.
- 12ვინ არის კაცი, რომელსაც სიცოცხლე სურს და უყვარს დღეგრძელობა სიკეთის სანახავად?
- 13შეიკავე შენი ენა ბოროტებისგან და ბაგენი - მზაკვრული სიტყვებისგან.
- 14ერიდე ბოროტებას და აკეთე სიკეთე; ეძიე მშვიდობა და მას მისდიე.
- 15უფლის თვალები მართლებისკენაა მიპყრობილი და მისი ყურები - მათი ღაღადისკენ.
- 16უფლის სახე ბოროტმოქმედთა წინააღმდეგაა, რათა დედამიწიდან წარხოცოს მათი სახსენებელი.
- 17მოუხმობენ მართალნი და ისმენს უფალი - ყველა გასაჭირისგან იხსნის მათ.
- 18ახლოა უფალი გულმოდრეკილებთან და სულით მორჩილებს იხსნის.
- 19მრავალი სიავე ხვდება მართალს და ყველაფრისგან იხსნის უფალი.
- 20მის ყოველ ძვალს იცავს იგი, მათგან ერთიც არ შეიმუსრება.
- 21ცოდვილს ბოროტება მოკლავს, მსჯავრს დაიტეხენ მართლის მოძულენი.
- 22უფალი გამოისყიდის თავის მსახურთა სულებს და მსჯავრი არ დაედება, ვინც მას აფარებს თავს.
იტვირთება შემდეგი თავი