ფსალმუნები — ახალი გადამუშავებული გამოცემა 2015
იტვირთება წინა თავი
თავი 34
- 1უფალო, ედავე ჩემთან მოდავეებს და ებრძოლე ჩემს წინააღმდეგ მებრძოლთ.
- 2აიღე ფარი და საჭურველი და აღსდექ ჩემდა შესაწევნად.
- 3მახვილი აღმართე და გზა გადაუკეტე ჩემს მდევნელებს. უთხარი ჩემს სულს: "შენი მხსნელი ვარ”.
- 4შერცხვნენ და გაწბილდნენ ჩემი სიცოცხლის მაძიებელნი, უკუიქცნენ სირცხვილნაჭამნი, ჩემთვის სიავის მსურველნი.
- 5ბზესავით შეიქნენ ქარის წინაშე და უფლის ანგელოზმა უკუაგდოს ისინი.
- 6იყოს მათი გზა ბნელი და მოლიპული, უფლის ანგელოზი სდევნიდეს მათ.
- 7რადგან უმიზეზოდ დამიგეს მახე, უსაბაბოდ გაუთხარეს ორმო ჩემს სულს.
- 8უბედურება დაატყდეს მათ უცაბედად! თავიანთ მომზადებულ მახეში გაებნენ და დასაღუპად ჩავარდნენ მასში;
- 9მაშინ გაიხარებს უფლით ჩემი სული, მისი შემწეობით ილხენს.
- 10იტყვის ყოველი ძვალი ჩემი: "უფალო, ვინ არის შენი მსგავსი? შენ იხსნი სუსტს მძლავრისგან, ღარიბს და ღატაკს - მისი მძარცველისგან”.
- 11აღსდგნენ ჩემს წინააღმდეგ ავი ცრუმოწმენი; რაც არ ვიცი - იმას მეკითხებიან.
- 12სიკეთის წილ ბოროტებით მიხდიან, ჩემი სულის დაობლება სურთ.
- 13მე კი ძაძებს ვიცვამდი მათი სნეულების ჟამს, ჩემს სულს მარხვით ვიძაბუნებდი, მაგრამ ჩემი ლოცვა უკან მიბრუნდებოდა.
- 14ისე ვწუხდი, როგორც მეგობრისთვის ან ძმისთვის, დედაზე მგლოვიარესავით დავიარებოდი დანაღვლიანებული და თავდახრილი.
- 15ისინი კი ხარობდნენ ჩემი წაბორძიკებისას და ჩემს წინააღმდეგ იკრიბებოდნენ. სულმდაბალნი, რომელთაც არ ვიცნობდი მგლეჯდნენ და არ მეშვებოდნენ.
- 16პირფერული დაცინვით აღრჭენდნენ კბილებს ჩემს წინააღმდეგ.
- 17უფალო, რამდენ ხანს უყურებ? იხსენი ჩემი სული მათი გაპარტახებისგან, ლომებისგან - ჩემი ერთადერთი.
- 18მადლობას შემოგწირავ დიდ კრებულში, უამრავ ხალხში შეგასხამ ხოტბას.
- 19რათა არ გაიხარონ ჩემზე უსამართლოდ გადამტერებულებმა და ნუ ანიშნებენ ერთიმეორეს, უმიზეზოდ ჩემი მოძულენი.
- 20რადგან მშვიდობაზე არ ლაპარაკობენ და ქვეყნის მშვიდობის მოყვარულთა მიმართ მზაკვრობას იზრახავენ.
- 21ფართოდ მოაღეს ჩემზე პირი, ამბობენ: "ოჰო! ოჰო! იხილა თვალმა ჩვენმა”.
- 22შენ ხომ იხილე, უფალო, ნუ დადუმდები, ღმერთო, ნუ გამშორდები;
- 23აღსდექ, გამოიღვიძე ჩემს დასაცავად, უფალო, ღმერთო ჩემო, ჩემი დავის დასაცავად.
- 24განმიკითხე შენი სამართლით, ნუმც გაიხარებენ ჩემზე.
- 25ნუ იტყვიან თავის გულში: ოჰო! სწორედ ასე გვენება! ნუ იტყვიან! ჩავყლაპეთ იგი!
- 26შერცხვეს და გაწბილდეს ყველა, ვისაც ჩემი ცუდი უხარია, სირცხვილით შეიმოსოს, ვინც მედიდურად მექცევა.
- 27იგალობოს და იმხიარულოს, ვისაც გამართლება სურს ჩემი, დაე, თქვან მარადჟამს: "დიდია უფალი, მისი მსახურისთვის მშვიდობის მსურველი!”
- 28ჩემი ენა კი შენს სიმართლეზე ილაპარაკებს და გაქებს მთელს დღეს.
იტვირთება შემდეგი თავი