ფსალმუნები — ახალი გადამუშავებული გამოცემა 2015
იტვირთება წინა თავი
თავი 36
- 1ნუ განრისხდები ბოროტმოქმედთა გამო, უკანონობის ჩამდენების ნუ შეგშურდება.
- 2რადგან ბალახივით მალე გახმებიან და მწვანილივით დაჭკნებიან.
- 3მიენდე უფალს და ჰქმენ კეთილი; დამკვიდრდი ქვეყანაზე და შეინარჩუნე ერთგულება.
- 4ისიამოვნე უფლის მიერ და ის აგისრულებს გულის საწადელს.
- 5ღმერთს მიანდე შენი გზასავალი, მიენდე მას და ის აღასრულებს.
- 6ნათელივით გამოიტანს სიმართლეს შენსას და შენს სამართალს - შუადღესავით.
- 7დაემორჩილე უფალს და მოთმინებით დაელოდე მას. ნუ განრისხდები თავის გზაზე წარმატებულ, ბოროტის განმზრახველ კაცზე.
- 8მოეშვი რისხვას და მიატოვე გულისწყრომა; ნუ განრისხდები, არ გაბოროტდე.
- 9რადგან მოიკვეთებიან ბოროტმოქმედნი, უფალზე მინდობილნი კი ქვეყანას დაიმკვიდრებენ.
- 10კიდევ ცოტა, და აღარ იქნება ბოროტი, დაუკვირდები მის ადგილს და აღარ იქნება იგი.
- 11თავმდაბალნი კი ქვეყანას დაიმკვიდრებენ და დიდი მშვიდობით დაამდებიან.
- 12ავი განზრახვა აქვს ბოროტს მართლისადმი და კბილებს აღრჭენს მის წინააღმდეგ.
- 13მაგრამ უფალი დასცინებს მას, ვინაიდან, ხედავს რომ მოდის მისი დღე.
- 14მახვილი იშიშვლეს ბოროტებმა და მშვილდი მოზიდეს, რათა ძირს დასცენ ღარიბ-ღატაკნი და მოსპონ სწორი გზებით მოარულნი.
- 15მათი მახვილი მათსავე გულს განგმირავს და მათი მშვილდი გადატყდება.
- 16მართლის მცირედი სჯობია უკეთურთა დიდ სიმდიდრეს.
- 17რადგან შეიმუსრება უკეთურთა მკლავები, მართალთა შემწე კი ღმერთია.
- 18იცის უფალმა უმწიკვლოთა დღენი, უკუნისამდე იქნება მათი მემკვიდრეობა.
- 19არ შერცხვებიან სიავის ჟამს და შიმშილის დღეებში დაპურდებიან.
- 20ბოროტნი კი დაიღუპებიან და მტერნი უფლისა, საძოვრების სიხასხასის მსგავსად გაქრებიან; კვამლივით გაუჩინარდებიან.
- 21ბოროტი სესხულობს და არ იხდის, მართალი კი მოწყალეა და გასცემს.
- 22რადგან უფლის მიერ ნაკურთხნი დაიმკვიდრებენ ქვეყანას, მის მიერ დაწყევლილნი კი ამოწყდებიან.
- 23უფლის მიერ წარიმართება კაცის ნაბიჯები და განამტკიცებს მას, ვისი გზებიც მოსწონს.
- 24კიდეც რომ წაბორძიკდეს, არ დაეცემა, რადგან უფალს უჭირავს მისი ხელი.
- 25ყმაწვილი ვიყავი, კიდეც მოვხუცდი და არ მინახავს მართალი კაცი მიტოვებული და მისი შთამომავლობა პურზე ხელგაწვდილი.
- 26ის ყოველდღე მოწყალებას გაიღებს და გაასესხებს, კურთხეულია მისი შთამომავალი.
- 27მოერიდე ბოროტს, სიკეთე აკეთე და სამუდამოდ დამკვიდრდები.
- 28რადგან სამართლის მოყვარულია უფალი და არ მიატოვებს მის ერთგულებს - სამარადისოდ დაცულნი იქნებიან; ბოროტთა ნაშიერი კი ამოწყდება.
- 29მართალნი დაიმკვიდრებენ ქვეყანას და საუკუნოდ დამკვიდრდებიან მასზე.
- 30მართლის ბაგენი სიბრძნეს წარმოთქვამენ და მისი ენა სიმართლეს ლაპარაკობს.
- 31გულში აქვს თავისი ღმერთის რჯული, არ დაუსხლტება ნაბიჯები.
- 32უთვალთვალებს მართალს ბოროტი და მის მოკვლას აპირებს.
- 33მაგრამ უფალი არ მიატოვებს მას მის ხელში და განკითხვის ჟამს არ გაამტყუნებს.
- 34მიენდე უფალს, დაიცავი მისი გზა და ის აგამაღლებს, რათა დაიმკვიდრო ქვეყანა და იხილო უკეთურთა განადგურება.
- 35მინახავს უწმიდური ბოროტმოქმედი - ლიბანის კედარივით ფესვგადგმული.
- 36მაგრამ ჩაიარა და, აჰა, აღარ არის, ვეძებ მას და ვეღარ ვპოულობ.
- 37დაუკვირდი უმწიკვლოს და შეხედე მართალს, რადგან მშვიდობიან კაცს ეკუთვნის მომავალი.
- 38ცოდვილნი კი ერთიანად მოისპობიან და ბოროტთა მომავალი გადაშენდება.
- 39მართალთა შველა კი უფლისგანაა, ის არის მათი თავშესაფარი გაჭირვების ჟამს.
- 40ეხმარება მათ უფალი და იხსნის; ბოროტთაგან იხსნის და გადაარჩენს, რადგან მასში ეძებენ თავშესაფარს.
იტვირთება შემდეგი თავი