ფსალმუნები — ახალი გადამუშავებული გამოცემა 2015
იტვირთება წინა თავი
თავი 43
- 1ღმერთო, ჩვენი ყურით გვაქვს მოსმენილი, ჩვენმა მამებმა გვიამბეს, საქმე, რომელიც მათ დღეებში, უძველეს დროში მოიმოქმედე.
- 2შენი ხელით განდევნე ერები, მათ ნაცვლად კი ისინი დარგე; შენ გაანადგურე ხალხები და გაფანტე.
- 3რადგან ხმლით კი არ დაუპყრიათ ქვეყანა და არც მათ მკლავებს არ მოუტანიათ მათთვის გამარჯვება, არამედ შენმა მარჯვენამ, შენმა მკლავმა და შენი სახის სინათლემ, რადგან შეიყვარე ისინი.
- 4შენ ხარ მეფე ჩემი, ღმერთო; უბოძე იაკობს გამარჯვება.
- 5შენით ვდევნით ჩვენს მტრებს; შენი სახელით ვთრგუნავთ ჩვენს მოდავეებს.
- 6რადგან არ ვარ დანდობილი ჩემს მშვილდზე და ვერც ჩემი მახვილი მიხსნის.
- 7არამედ შენ გვიხსნი ჩვენი მტრებისგან და ჩვენს მოძულეებს შენ არცხვენ.
- 8ღმერთით ვიკვეხნით ყოველდღე და შენს სახელს ვაქებთ უკუნისამდე.
- 9ახლა კი მიგვატოვე და შეგვარცხვინე და არ გამოდიხარ ჩვენს ლაშქართან.
- 10უკუგვაქციე ჩვენი მტრისგან და მოძულეებმა გაგვძარცვეს ჩვენ.
- 11მიგვეცი, როგორც ცხვარი, შესაჭმელად და დაგვფანტე ხალხებს შორის.
- 12სარგებლის გარეშე გაჰყიდე შენი ერი და არ იდავე მათ ფასზე.
- 13შესარცხვენად მიგვეცი მეზობლებს, დასაცინად და საგინებლად - ჩვენ ირგვლივ მყოფთ.
- 14იგავად გვაქციე ხალხთა შორის, თავის საქნევად ერებს შორის.
- 15ყოველდღე ჩემს წინაშეა ჩემი აუგი და სირცხვილი მიფარავს სახეს
- 16დამცინავისა და მგმობელის ხმისგან, მტრისა და შურისმაძიებლისაგან.
- 17ყოველივე ეს გვეწია ჩვენ და მაინც არ დაგივიწყეთ, არ გაგვიმრუდებია შენი აღთქმა.
- 18არ უკუქცეულან ჩვენი გულები და არც ჩვენს ნაბიჯებს გადაუხვევიათ შენი გზიდან.
- 19და მაინც შეგვმუსრე, ტურების სადგომს დაგვამსგავსე და სიკვდილის აჩრდილი გადაგვაფარე.
- 20ჩვენი ღმერთის სახელი რომ დაგვევიწყებინა და ხელი უცხო ღმერთებისკენ გაგვეშვირა,
- 21განა არ გვაზღვევინებდა ამას ღმერთი? რადგან იცის მან საიდუმლონი გულისა.
- 22შენ გამო გვხოცავენ ყოველდღე, დასაკლავ ცხვრებად ვართ მიჩნეულნი.
- 23გამოიღვიძე, რატომ გძინავს, უფალო? გამოფხიზლდი, ნუ უკუგვაგდებ სამარადისოდ.
- 24შენ სახეს რად გვიმალავ? ივიწყებ ჩვენს ტანჯვასა და გაჭირვებას?
- 25რადგან მტვრამდე დამდაბლდა ჩვენი სული, მიწას მიეწება ჩვენი მუცელი.
- 26აღსდექ ჩვენს დასახმარებლად და გვიხსენი შენი წყალობისამებრ!
იტვირთება შემდეგი თავი