ფსალმუნები — ახალი გადამუშავებული გამოცემა 2015

თავი 52

1. 1
   თქვა ბრიყვმა თავის გულში: "არ არის ღმერთი”, გაირყვნენ და საძაგლად იქცევიან თავიანთი უმართლობით; ერთიც არაა კეთილის მოქმედი.
2. 2
   ზეციდან გადმოჰყურებს ღმერთი ადამის ძეთ, რათა იხილოს, თუ არის ვინმე გონიერი, ღმერთს რომ ეძიებდეს.
3. 3
   ყველა გაუკუღმართდა, გაიხრწნა ერთობ, ერთიც არაა კეთილის მოქმედი.
4. 4
   ნუთუ ვერ შეიგნეს სიმრუდის მქმნელებმა, ჩემს ხალხს რომ ჭამენ, თითქოს პურს ჭამდნენ, ღმერთს კი არ უხმობენ.
5. 5
   დიდად შეშინდნენ იქ, სადაც შიში არ იყო, რადგან ღმერთმა განაბნია შენზე ამხედრებულთა ძვლები; ამიტომ შეარცხვინე ისინი, რადგან ღმერთისგან იყვნენ უარყოფილნი.
6. 6
   ნეტავ მოვიდოდეს სიონიდან ხსნა ისრაელისა! როცა დააბრუნებს ღმერთი ტყვეებს თავისი ხალხიდან, ილხენს იაკობი და გაიხარებს ისრაელი.