ფსალმუნები — ახალი გადამუშავებული გამოცემა 2015
იტვირთება წინა თავი
თავი 58
- 1მიხსენი ჩემი მტრებისგან, ღმერთო ჩემო; დამიცავი მათგან, ვინც ჩემს წინააღმდეგ აღდგა.
- 2მიხსენი სიავის მქმნელთაგან და სისხლისმღვრელთაგან გადამარჩინე.
- 3აჰა, ჩაუსაფრდნენ ჩემს სიცოცხლეს; აღდგნენ ჩემზე ძლიერნი, თუმცა არც დანაშაული მიმიძღვის და არც შეცოდება, უფალო.
- 4უდანაშაულო ვარ, და მაინც ჩემს წინააღმდეგ გამოდიან, აღსდექ ჩემს შესახვედრად და მომხედე.
- 5შენ კი უფალო, ცაბაოთ ღმერთო, ღმერთო ისრაელისა, აღსდექ, რომ განიკითხო ერები; არ დაინდო სიავის მქმნელნი, მოღალატენი.
- 6საღამოობით ბრუნდებიან, ძაღლებივით ყმუიან და გარს უვლიან ქალაქს.
- 7აგერ, გმობას ანთხევენ თავიანთი პირებიდან, მახვილი აქვთ ბაგეებში, აქაოდა ვინ ისმენსო.
- 8შენ კი გაიცინებ მათზე უფალო, დასცინებ ყველა ხალხს.
- 9ძალავ ჩემო, შენ მოგენდობი, რადგან ღმერთია ჩემი სიმაგრე.
- 10ღმერთი ჩემი მწყალობელი წინ წამიძღვება; გამარჯვებით შემახედებს იგი ჩემს მტრებზე.
- 11ნუ დახოცავ მათ, თორემ დაივიწყებს ჩემი ერი, გაფანტე შენი ძალით და დაამდაბლე, ფარო ჩვენო, უფალო.
- 12რადგან მათი პირის ცოდვა არის მათი სიტყვა, დაე, გაებან მახეში თავიანთი ქედმაღლობით, ტყუილი ფიცისა და პირფერობისთვის,
- 13მოსპე რისხვით, მოსპე რომ აღარ იყვნენ და შეიტყონ, რომ ღმერთი ბატონობს იაკობზე, ქვეყნიერების კიდით-კიდემდე.
- 14დაე, დაბრუნდნენ საღამოობით, იყმუვლონ ძაღლივით და გარს შემოუარონ ქალაქს.
- 15დაე, იწოწიალონ საჭმლისათვის და მშივრებმა გაათიონ ღამე.
- 16მე კი შენს სიძლიერეს ვუმღერებ და დილდილობით ვიღაღადებ შენს წყალობაზე, რადგან შენ იყავი ჩემი ბურჯი და თავშესაფარი ჩემი გაჭირვების დღეს.
- 17ძალავ ჩემო, შენ გიგალობებ, რადგან ღმერთია ჩემი ბურჯი, ღმერთი - ჩემი მწყალობელი.
იტვირთება შემდეგი თავი