ფსალმუნები — ახალი გადამუშავებული გამოცემა 2015
იტვირთება წინა თავი
თავი 65
- 1სიხარულით შესძახე ღმერთს, მთელო ქვეყნიერებავ.
- 2უგალობეთ მისი სახელის დიდებას, ხოტბა შეასხით მის დიდებას.
- 3უთხარით ღმერთს: "რა საოცარია შენი საქმენი, დაგემორჩილებიან შენი მტრები, შენი ძალის სიდიადის გამო.
- 4მთელი ქვეყნიერება გცემს თაყვანს შენ და ქებას უმღერს შენს სახელს”.
- 5მოდით და ნახეთ ღვთის ნამოქმედარი, საოცარია მისი საქმენი ადამიანის შვილების მიმართ.
- 6ზღვა ხმელეთად გადააქცია, მდინარე ფეხით გადალახეს; იქ გავიხარეთ მის გამო.
- 7უკუნისამდე მეფობს თავისი ძლიერებით, მისი თვალები ერებს აკვირდება, რომ არ აღსდგნენ ურჩნი.
- 8ადიდეთ ერებო ჩვენი ღმერთი და აღავლინეთ ხმა მისი ქებისა.
- 9მან შეუნარჩუნა სიცოცხლე ჩვენს სულს და ფეხი ჩვენი დაიცვა წაბორძიკებისგან.
- 10რადგან, გამოგვცადე ჩვენ ღმერთო, გადაგვადნე, როგორც ვერცხლს ადნობენ.
- 11ბადეში მოგვაქციე, ჩაგვრის ტვირთი აგვკიდე ზურგზე.
- 12კაცი აამხედრე ჩვენზე; ცეცხლსა და წყალში გამოგვატარე და სიუხვის ადგილზე მოგვიყვანე.
- 13სრულადდასაწველით მოვალ შენს სახლში და აგისრულებ ჩემს აღთქმებს,
- 14რომლებიც წარმოთქვეს ჩემმა ბაგეებმა და ჩემმა პირმა აღგითქვა გაჭირვების ჟამს.
- 15მსუყე სრულადდასაწველს ამოგიტან საკმევითა და ერკემლით. მოზვრებს და ვაცებს შემოგწირავ.
- 16მოდით, მოისმინეთ ყველამ, ვისაც ღმერთის შიში გაქვთ და გიამბობთ, რა გააკეთა მან ჩემი სულისთვის.
- 17ჩემი ბაგეებით შევღაღადე და ჩემი ენით აღვამაღლე იგი.
- 18სიმრუდე რომ შეემჩნია ჩემს გულში, არ შეისმენდა უფალი.
- 19მაგრამ ნამდვილად მისმინა ღმერთმა, ყური მოაპყრო ჩემი ლოცვის ხმას.
- 20კურთხეულ იყოს ღმერთი, რომელმაც არ უარყო ჩემი ლოცვა და არ მომაკლო თავისი წყალობა.
იტვირთება შემდეგი თავი