ფსალმუნები — ახალი გადამუშავებული გამოცემა 2015
იტვირთება წინა თავი
თავი 7
- 1უფალო, ღმერთო ჩემო! შენზე ვარ მონდობილი. დამიხსენი ყველა მდევნელისგან და გადამარჩინე
- 2თორემ ლომივით დაგლეჯენ ჩემს სულს, დამფლითავენ და არ იქნება მხსნელი.
- 3უფალო, ღმერთო ჩემო! თუ რამ ჩავიდინე, თუ უმართლობა აღსრულდა ჩემი ხელით,
- 4თუ ჩემთვის მშვიდობის მსურველს ბოროტებით გადავუხადე ან თუ გამეძარცვოს ის, ვინც უმიზეზოდ მმტრობს,
- 5მაშინ დევნოს მტერმა ჩემი სული, წამოეწიოს, ძირს დაანარცხოს ჩემი სიცოცხლე და მტვრად აქციოს ღირსება ჩემი.
- 6აღსდექ უფალო შენი რისხვით, წამოიმართე და წალეკე ჩემი მტრები, აღსდექ სასამართლოზე, რომელიც შენ დამიდგინე.
- 7გარს შემოგეხვევა ხალხთა კრებული, მათ ზემოთ ამაღლდები მწვერვალზე.
- 8უფალი განსჯის ერებს. განმიკითხე, უფალო, ჩემი სიმართლით და უბიწოებით, რომელიც ჩემშია.
- 9შეწყდეს უმართლოთა ბოროტება, მართალი კი განამტკიცე, რადგან შენ სცდი გულებსა და ზრახვებს, მართალო ღმერთო!
- 10ღმერთია ჩემი ფარი, ის იხსნის გულმართლებს.
- 11ღმერთი მართალი მსაჯულია, ღმერთი, რომელიც ყოველდღე აფრქვევს რისხვას.
- 12თუ კაცი არ მოექცევა - მახვილს გალესავს, მშვილდს მოზიდავს და დაუმიზნებს.
- 13სასიკვდილო იარაღი გაამზადა მისთვის, ცეცხლოვან ისრებს ამზადებს.
- 14აჰა, ბოროტება ჩაესახა, სიმრუდით დაორსულდა და სიცრუეს შობს.
- 15ორმოს თხრიდა და ღრმა ამოკვეთა, სხვისთვის გაამზადა ორმო და თვითონ ჩავარდა.
- 16მისივე თავზე დატრიალდა მისი ავგულობა და თავისივე ბოროტმოქმედება დაატყდა თხემზე.
- 17განვადიდებ უფალს მისი სიმართლისამებრ და ვუგალობებ უზენაესი უფლის სახელს.
იტვირთება შემდეგი თავი