ფსალმუნები — ახალი გადამუშავებული გამოცემა 2015
იტვირთება წინა თავი
თავი 70
- 1უფალო, შენში ვეძებ თავშესაფარს, ნუმც შევრცხვენილვარ უკუნისამდე.
- 2მიხსენი შენი სიმართლით და გადამარჩინე, ყური მომაპყარ და მიშველე.
- 3იყავი ჩემთვის კლდოვანი თავშესაფარი, რომ ყოველთვის იქ შევდიოდე; ბრძანე ჩემი შველა, რადგან კლდე და სიმაგრე ხარ ჩემი.
- 4ღმერთო ჩემო, ბოროტის ხელისგან მიხსენი, უკანონობის მოქმედისა და მძარცველის ხელისგან.
- 5რადგან შენა ხარ ჩემი იმედი, უფალო, ღმერთო ჩემო, შენზე ვარ მონდობილი ყრმობიდანვე.
- 6დედის მუცლიდანვე შენზე ვიყავი დანდობილი, შენ გამომიყვანე დედის საშოდან; მუდამ შენ გეკუთვნის ჩემი ხოტბა.
- 7საკვირველი გავხდი მრავალთათვის; მაგრამ შენ ხარ ჩემი მტკიცე თავშესაფარი.
- 8შენი ქებითაა სავსე ჩემი პირი; მთელი დღე შენს დიდებულებაზე ვლაპარაკობ.
- 9ნუ უკუმაგდებ სიბერის ჟამს, ნუ მიმატოვებ, როცა დაიშრიტება ძალა ჩემი.
- 10რადგან მოილაპარაკეს ჩემმა მტრებმა და ერთად იზრახავენ ჩემი სიცოცხლის წინააღმდეგ ჩასაფრებულნი.
- 11ამბობენ, ღმერთმა მიატოვაო იგი, დაედევნეთ და შეიპყარით, რაკი არა ჰყავს მხსნელი.
- 12ღმერთო, ნუ გამშორდები; ღმერთო ჩემო, გამოეშურე ჩემს შესაწევნად.
- 13დაე, შერცხვნენ და მოისპონ ჩემი მტრები; სირცხვილმა და გაჭირვებამ დაფაროს ჩემთვის სიავის მაძიებლები.
- 14მე კი გამუდმებით შენ გელოდები და ვამრავლებ შენს დიდებას;
- 15ბაგენი ჩემი ილაპარაკებენ შენს სიმართლეზე, მთელ დღეს - შენმიერ ხსნაზე, რადგან არ ვიცი მათი რიცხვი.
- 16მოვალ და ღმერთის, უფლის დიად საქმეებზე ვილაპარაკებ; შენს სიმართლეს, მხოლოდ შენსას გავიხსენებ.
- 17ღმერთო, შენ მასწავლიდი ყრმობიდანვე და დღესაც შენს საოცრებაზე ვლაპარაკობ.
- 18ჭაღარამდე, ღრმა სიბერემდე ნუ მიმატოვებ ღმერთო, ვიდრე გავუცხადებდე შენს ძლიერებას ამ თაობას და ყველა მომავალს - შენს შეძლებას.
- 19ცას სწვდება შენი სიმართლე ღმერთო; დიადია საქმენი შენი, ვინ შეგედრება, ღმერთო?!
- 20შენ მაჩვენებდი მრავალ და მძიმე გასაჭირს, მაგრამ კვლავ მაცოცხლებდი და დედამიწის უფსკრულიდან ამოგყავდი.
- 21შენ მმატებდი დიდებას და ბრუნდებოდი ჩემს სანუგეშებლად.
- 22და მეც ებნით შევაქებ შენს ერთგულებას, ღმერთო; ქნარით გიმღერებ, ისრაელის წმიდავ.
- 23სიხარულით იყიჟინებენ ჩემი ბაგეები, როცა გიგალობებ და ჩემი სულიც - შენ რომ გამოისყიდე.
- 24ჩემი ენაც ყოველდღე ილაპარაკებს შენს სიმართლეზე, რადგან შერცხვნენ და დამცირდნენ ჩემი ავის მაძიებელნი.
იტვირთება შემდეგი თავი