ფსალმუნები — ახალი გადამუშავებული გამოცემა 2015
იტვირთება წინა თავი
თავი 78
- 1ღმერთო! ხალხები შემოიჭრნენ შენს სამკვიდრებელში, შებილწეს შენი წმიდა ტაძარი, ნანგრევებად აქციეს იერუსალიმი.
- 2შენი მსახურების გვამები ცის ფრინველებს მისცეს საჭმელად, შენი ერთგული ხალხის ხორცი - დედამიწის მხეცებს.
- 3წყალივით დაღვარეს მათი სისხლი იერუსალიმის გარშემო, და დამმარხავი არავინაა.
- 4სალანძღად გავხდით ჩვენი მეზობლებისთვის, მასხრად ასაგდები და დასაცინი - ჩვენ ირგვლივ მყოფთათვის.
- 5როდემდე იქნები, უფალო, განრისხებული? სამუდამოდ? როდემდე იგიზგიზებს ცეცხლივით შენი მოშურნეობა?
- 6გადმოღვარე შენი რისხვა იმ ხალხებზე, რომ არ გცნობენ და სამეფოებზე, შენს სახელს რომ არ მოუხმობენ.
- 7რადგან შეჭამეს იაკობი და გააპარტახეს მისი სადგომი.
- 8ნუ გაგვიხსენებ მამების ცოდვებს; მალე შეგვეგებოს შენი წყალობა, რადგან მეტისმეტად დავუძლურდით.
- 9გვიშველე, ჩვენი ხსნის ღმერთო, შენი სახელის სადიდებლად გადაგვარჩინე და შენი სახელის გამო შეგვინდე ჩვენი ცოდვები.
- 10რატომ უნდა თქვან ერებმა - სად არისო მათი ღმერთი? დაე, ცნობილი იყოს ჩვენს თვალწინ, ხალხებს შორის, რომ შენი მსახურების დაღვრილი სისხლის გამო შურს იძიებ.
- 11მოაღწიოს შენამდე ტუსაღის კვნესამ. შენი მკლავის სიძლიერით დაიფარე სასიკვდილოდ განწირულნი.
- 12შვიდმაგად დაუბრუნე ჩვენს მეზობლებს მათ წიაღში ის დამცირება, რომლითაც შენ გამცირებდნენ უფალო.
- 13ჩვენ კი შენი ხალხი და შენი სამწყსოს ცხვარი, სამუდამოდ მოგიძღვნით ხოტბას და თაობიდან თაობას მოვუთხრობთ შენს დიდებას.
იტვირთება შემდეგი თავი