ფსალმუნები — ახალი გადამუშავებული გამოცემა 2015
იტვირთება წინა თავი
თავი 84
- 1უფალო, მოწყალე იყავი შენი ქვეყნის მიმართ, შენ აღადგინე კეთილდღეობა იაკობისა.
- 2შენ აპატიე შენს ხალხს დანაშაული, დაფარე ყველა მათი ცოდვა.
- 3შენ აგვარიდე შენი გულისწყრომა, დააცხრე შენი მრისხანება.
- 4აგვაღორძინე ღმერთო, ჩვენო მხსნელო და ნუღარ გაგვირისხდები.
- 5ნუთუ სამუდამოდ გაგვირისხდები, თაობიდან თაობამდე გააგრძელებ შენს რისხვას ჩვენზე?
- 6ნუთუ აღარ დაგვიბრუნებ სიცოცხლეს, რათა შენში გაიხაროს შენმა ხალხმა?
- 7გვიჩვენე უფალო, შენი სიკეთე და შენმიერი ხსნა გვიწყალობე.
- 8მე კი მოვისმენ თუ რას იტყვის უფალი ღმერთი; რადგან მშვიდობას იტყვის თავის ხალხზე, თავის წმიდანებზე და აღარ მიუბრუნდებიან სიბრიყვეს ღვთისმოსავნი.
- 9მართლაც ახლოა მისმიერი ხსნა მის მოშიშთათვის, რათა დიდებამ დაისადგუროს ჩვენს ქვეყანაში.
- 10წყალობა და ჭეშმარიტება შეხვდებიან ერთმანეთს, სიმართლე და მშვიდობა გადაჰკოცნიან ერთიმეორეს.
- 11ჭეშმარიტება აღმოცენდება დედამიწიდან, სიმართლე კი ზეციდან გადმოიხედავს.
- 12დიახ, სიკეთეს გვიბოძებს უფალი და ჩვენი მიწა თავის მოსავალს გამოიღებს.
- 13სიმართლე ივლის მის წინ და გზას გაუკაფავს მის ნაბიჯებს.
იტვირთება შემდეგი თავი