ფსალმუნები — ახალი გადამუშავებული გამოცემა 2015
იტვირთება წინა თავი
თავი 85
- 1ყური მომაპყარ უფალო და მიპასუხე, რადგან ღარიბ-ღატაკი ვარ.
- 2დაიფარე ჩემი სიცოცხლე, რადგან ღვთისმოსავი ვარ; იხსენი შენი მსახური, ღმერთო ჩემო, რომელიც შენზეა მონდობილი.
- 3შემიწყალე, უფალო, რადგან შენ მოგიხმობ ყოველდღე.
- 4გაახარე შენი მსახური, რადგან შენკენ აღვაპყარ ჩემი სული, უფალო.
- 5რადგან, კეთილი და მიმტევებელი ხარ შენ, უფალო, და დიდად მოწყალე ყველასთვის, ვინც შენ მოგიხმობს.
- 6უფალო, ისმინე ჩემი ლოცვა და ყურად იღე ჩემი ვედრება,
- 7ჩემი გაჭირვების დღეს მოგიხმობ, რადგან მიპასუხებ.
- 8არაა შენი მსგავსი ღმერთებს შორის, უფალო, და არც მსგავსი საქმეთა შენთა.
- 9შენ მიერ გაჩენილი ყოველი ერი მოვა და მოიდრიკება შენ წინაშე, უფალო, და განადიდებს შენს სახელს,
- 10რადგან დიადი და სასწაულმოქმედი ხარ, შენ ხარ ერთადერთი ღმერთი.
- 11შენი გზა მასწავლე უფალო და ვივლი შენს ჭეშმარიტებაში. წარმართე ჩემი გული შენი სახელის მოშიშებით.
- 12ქებას მოგიძღვნი უფალო, ღმერთო ჩემო, მთელი გულით და უკუნისამდე განვადიდებ შენს სახელს,
- 13რადგან დიდია შენი სიკეთე ჩემს მიმართ, შენ გადამარჩინე შავეთის ქვესკნელისგან.
- 14ღმერთო, აღდგნენ ქედმაღალნი ჩემს წინააღმდეგ და მტარვალთა მთელი კრებული ეძიებს ჩემს სიცოცხლეს, რადგან დაგივიწყეს.
- 15შენ კი უფალო ღმერთო, შემწყალევ და მადლიანო, რისხვაში ნელი - ხოლო, წყალობასა და ჭეშმარიტებაში უხვი ხარ.
- 16მომხედე და შემიწყალე, მიეცი შენი ძალა შენს მორჩილს და იხსენი ძე შენი მხევლისა.
- 17სასიკეთო ნიშანი მიჩვენე, რათა იხილონ ჩემმა მოძულეებმა და შერცხვნენ, რადგან შენ შემეწიე და მანუგეშე უფალო.
იტვირთება შემდეგი თავი