ფსალმუნები — ახალი გადამუშავებული გამოცემა 2015
იტვირთება წინა თავი
თავი 88
- 1მუდამ ვუგალობებ უფლის წყალობას, თაობიდან თაობას ვაცნობებ ჩემი ბაგით შენს ერთგულებას.
- 2რადგანაც ვთქვი: უკუნისამდეა დაფუძნებული შენი წყალობა და ცებშია განმტკიცებული შენი ერთგულება.
- 3შენ თქვი: აღთქმა დავუდე ჩემს რჩეულს, შევფიცე დავითს, ჩემს მსახურს:
- 4სამუდამოდ განვამტკიცებ შენს შთამომავლობას და თაობიდან თაობამდე დავაფუძნებ შენს ტახტს.
- 5ცანი განადიდებენ შენს საოცრებებს უფალო, და შენს ერთგულებას - წმიდანთა კრებულში.
- 6რადგან ვინ არის ცაში უფლის სადარი? ან ვინ არის უფლის მსგავსი ღვთის შვილებს შორის?
- 7დიდად საშიშია ღმერთი წმინდანთა კრებულში, შიშის მომგვრელია ის მის ირგვლივ მყოფთა შორის.
- 8უფალო, ცაბაოთ ღმერთო! ვინ არის შენებრ ძლევამოსილი უფალო? ძლიერი ხარ და ერთგულება გარტყავს გარშემო, უფალო!
- 9შენ ბატონობ ზღვის მოქცევაზე, აბობოქრებულ ტალღებს შენ ამშვიდებ.
- 10შენ შემუსრე რახაბი და მოკლულს დაამსგავსე; შენი ძლიერი მკლავით გაფანტე შენი მტრები.
- 11შენია ცანი, დედამიწაც შენია, სამყარო და მისი სავსება შენ დააფუძნე.
- 12ჩრდილოეთი და სამხრეთი შენ შექმენი; თაბორი და ხერმონი სიხარულით აქებენ შენს სახელს.
- 13ძლიერია შენი მკლავი; ძლევამოსილია შენი ხელი და შემართულია მარჯვენა შენი.
- 14სიმართლე და მართლმსაჯულებაა შენი ტახტის საფუძველი, წყალობა და ჭეშმარიტება დგანან შენ წინაშე.
- 15ნეტარია ხალხი, რომელიც სცნობს საზეიმო შეძახილს; შენი სახის სინათლეში ივლიან ისინი, უფალო;
- 16შენი სახელით ილხენენ მთელ დღეს და შენი სიმართლით მაღლდებიან.
- 17რადგან შენ ხარ მათი ძალის დიდება და შენი ნებით მომაღლდება ჩვენი რქა ღირსებისა.
- 18რადგან უფალია ჩვენი ფარი და ისრაელის წმიდა - მეფე ჩვენი.
- 19ოდესღაც ხილვაში ელაპარაკე შენს ერთგულებს და უთხარი: დახმარება ვუბოძე გმირს; ხალხში ავამაღლე რჩეული.
- 20ვპოვე დავითი, მსახური ჩემი და ჩემი წმიდა ზეთი ვცხე მას.
- 21ჩემი ხელი წარმართავს მას, და ჩემი მკლავი განამტკიცებს მას.
- 22მტერი ვერ დაჯაბნის მას და ურჯულო ვერ დაჩაგრავს.
- 23მის წინაშე შევმუსრავ მის მტრებს და მის მოძულეებს დავლახვრავ.
- 24ჩემი ერთგულება და წყალობა იქნება მასთან; ჩემი სახელით მომაღლდება მისი რქა ღირსებისა.
- 25ზღვას გადავაწვდენ მის ხელს და მდინარეებს - მის მარჯვენას.
- 26ის მომიხმობს: მამა ხარ ჩემი, ჩემი ღმერთი და ხსნის კლდე;
- 27მეც პირმშოდ დავადგენ მას, ქვეყნიერების მეფეებზე მეტად ავამაღლებ,
- 28უკუნისამდე შევუნახავ ჩემს წყალობას და ჩემი აღთქმა მტკიცე იქნება მისთვის.
- 29სამუდამოდ დავაფუძნებ მის შთამომავალს და მის ტახტს - ვითარცა ცათა დღეებს.
- 30თუ მიატოვებენ მისი ძენი ჩემს რჯულს და ჩემს სამართალს არ გაჰყვებიან,
- 31თუ ჩემს წესდებებს დაარღვევენ და ჩემს მცნებებს არ დაიცავენ,
- 32კვერთხით მოვკითხავ მათ დანაშაულს და გვემით - შეცოდებას.
- 33მაგრამ ჩემს წყალობას არ მოვუშლი მას და არ გავაცრუებ ჩემს ერთგულებას.
- 34არ დავარღვევ ჩემს აღთქმას და ჩემი პირით ნათქვამს არ შევცვლი.
- 35ერთხელ დავიფიცე ჩემი სიწმიდით: არ ვეცრუები დავითს.
- 36მარადჟამს იქნება მისი შთამომავალი და მისი ტახტი - როგორც მზე ჩემს წინაშე;
- 37მთვარესავით დაფუძნდება უკუნისამდე, როგორც ერთგული მოწმე ზეცაში.
- 38მაგრამ ახლა მიატოვე და უკუაგდე, განრისხდი შენს ცხებულზე.
- 39უგულებელჰყავი აღთქმა შენს მორჩილთან, მიწას დაანარცხე მისი გვირგვინი.
- 40მისი ყველა ზღუდე მოშალე, ნანგრევებად აქციე მისი სიმაგრენი.
- 41ძარცვავს მას ყველა გამვლელ-გამომვლელი, მეზობლების დასაცინი გახდა.
- 42მაღლა ასწიე მის მოშუღართა მარჯვენა, გაახარე ყველა მისი მტერი.
- 43მისი მახვილიც დააჩლუნგე და არ შეეწიე ბრძოლაში.
- 44გააცამტვერე მისი დიდება და მისი ტახტი მიწასთან გაასწორე.
- 45შეამოკლე დღენი მისი სიჭაბუკისა და სირცხვილით შემოსე იგი.
- 46როდემდე დაგვემალები უფალო, სამუდამოდ იგიზგიზებს ცეცხლივით შენი მრისხანება?
- 47გაიხსენე, რა ხანმოკლეა ჩემი სიცოცხლე, რა ამაოებისთვის შეჰქმენი ყოველი ძე კაცისა?
- 48ვინ არის კაცი, რომ იცოცხლოს და სიკვდილი არ იხილოს, თავი გადაირჩინოს საფლავისგან?
- 49სად არის შენი ადრინდელი წყალობა, უფალო, შენი ერთგულებით რომ შეჰფიცე დავითს?
- 50გაიხსენე უფალო, შენი მსახურების დამცირება, უბით რომ ვატარებდი ყველა ძლიერი ხალხისგან;
- 51როგორ ლანძღავენ შენი მტრები უფალო, როგორ ლანძღავენ შენი ცხებულის კვალს.
- 52კურთხეულ იყოს უფალი უკუნისამდე. ამინ და ამინ!
იტვირთება შემდეგი თავი