ფსალმუნები — ახალი გადამუშავებული გამოცემა 2015

თავი 89

1. 1
   უფალო! შენა ხარ ჩვენი თავშესაფარი თაობიდან თაობამდე.
2. 2
   ვიდრე მთები დაიბადებოდნენ და შექმნიდი დედამიწასა და სამყაროს, უსასრულობიდან უსასრულობამდე შენა ხარ ღმერთი.
3. 3
   კვლავ მტვრად აქცევ ადამიანს და ეტყვი: დაბრუნდით, ადამის ძენო!
4. 4
   რადგან ათასი წელი შენს თვალში, გუშინდელი, განვლილი დღესავით არის, როგორც ერთი საგუშაგო ღამისა.
5. 5
   ღვართქაფივით გააქანებ მათ, სიზმარივით ჩაივლიან, ბალახივით, რომელიც ფერს იცვლის ყოველ დილით:
6. 6
   დილას ჰყვავის და ფერს იცვლის, საღამოს ჭკნება და ხმება.
7. 7
   რადგან დავილიეთ შენი რისხვით და შენი გულისწყრომით შევძრწუნდით.
8. 8
   თვალწინ გაქვს დადებული ჩვენი დანაშაულებანი და ჩვენი საიდუმლო ცოდვანი - შენი სახის სინათლეზე.
9. 9
   რადგან ყველა ჩვენი დღე გაილია შენი რისხვით, ისე მიდის ჩვენი წლები, როგორც ერთი ამოსუნთქვა.
10. 10
    ჩვენი დღეების რიცხვი სამოცდაათი წელიწადია, ხოლო ჯანმაგრობის დროს - ოთხმოცი წელიწადი; ამათგან კი უმეტესი ჯაფა და წუხილია, რადგან სწრაფად გადის და ჩვენც მივფრინავთ.
11. 11
    ვინ შეიცნო შენი რისხვის ძალა? შენი მრისხანება ისეთივე დიდია, როგორც შენდამი მოშიშება.
12. 12
    გვასწავლე ჩვენი დღეების დათვლა, რომ გულს სიბრძნე შევძინოთ.
13. 13
    მობრუნდი უფალო! როდემდე გაგრძელდება ასე? შეიბრალე შენი მსახურები.
14. 14
    შენი წყალობით გაგვაძღე გარიჟრაჟზე, რათა სიხარულით ვიგალობოთ და ვიმხიარულოთ მთელი ჩვენი დღენი.
15. 15
    გაგვამხიარულე იმ დღეთა წილ, რომ დაგვტანჯე, იმ წელთა წილ, სიავე რომ ვნახეთ.
16. 16
    იხილონ შენმა მსახურებმა საქმენი შენი და შენი ბრწყინვალება - მათმა შვილებმა.
17. 17
    დაე, იყოს უფლის კეთილგანწყობა ჩვენზე, საქმე ჩვენი ხელისა განგვიმტკიცე, დიახ, საქმე ჩვენი ხელისა განგვიმტკიცე.