ფსალმუნები — ახალი გადამუშავებული გამოცემა 2015
იტვირთება წინა თავი
თავი 95
- 1უმღერეთ უფალს ახალი სიმღერა, უმღერე უფალს, მთელო ქვეყნიერებავ!
- 2უმღერეთ უფალს, აკურთხეთ მისი სახელი, დღითიდღე ახარეთ ხსნა მისმიერი.
- 3აუწყეთ ერებს მისი სიდიადე, ყოველ ხალხს მისი სასწაულები.
- 4რადგან დიადია უფალი და დიდად საქებარი, ყველა ღმერთზე საშიშია იგი.
- 5რადგან ხალხთა ყველა ღმერთი კერპებია, უფალმა კი ცანი შექმნა.
- 6სიდიადე და ბრწყინვალებაა მის წინაშე, ძალა და მშვენიერებაა - მის საწმიდარში.
- 7უძღვენით უფალს, ხალხთა ტომებო, უძღვენით უფალს - დიდება და ძალა.
- 8უძღვენით უფალს დიდება მისი სახელისა. წაუღეთ ძღვენი და მიდით მის ეზოებში.
- 9თაყვანი ეცით უფალს წმიდა მოწიწებით; თრთოდე მის წინაშე, მთელო ქვეყნიერებავ!
- 10უთხარით ერებს: უფალი მეფობს! დიახ, მტკიცედ არის დაფუძნებული სამყარო, არ შეირყევა. ის განიკითხავს ხალხებს თანაბრად.
- 11გაიხაროს ზეცამ და იმხიარულოს დედამიწამ. იხმაუროს ზღვამ და სავსებამ მისმა.
- 12გაიხაროს ტრამალმა და ყველაფერმა, რაც მასზეა. მაშინ იზეიმებს ტყის ყოველი ხე
- 13უფლის წინაშე, რადგან ქვეყნიერების განსასჯელად მოდის იგი; სიმართლით განსჯის ქვეყნიერებას და ხალხებს - თავისი ჭეშმარიტებით.
იტვირთება შემდეგი თავი