მათეს სახარება — ახალი აღთქმა, სტოკჰოლმი 1985
იტვირთება წინა თავი
თავი 11
- 1ხოლო იოანემ საპყრობილეში გაიგო ქრისტეს მოქმედებანი და თავისი მოწაფეები გაუგზავნა,
- 2რომ ეთქვათ მისთვის: შენ ხარ ის, რომელიც უნდა მოვიდეს, თუ სხვას ველოდოთ?
- 3იესომ უთხრა მათ პასუხად: წადით მოახსენეთ იოანეს, რასაც ისმენთ და ხედავთ.
- 4ბრმები ხედავენ და ხეიბრები დადიან, კეთროვნები იწმინდებიან და ყრუებს ესმით, მკვდრები დგებიან და ღატაკებს ეხარებათ.
- 5და ნეტარ არს, ვინც არ შეცდება ჩემში.
- 6როცა ისინი მიდიოდნენ, იესომ დაიწყო ლაპარაკი ხალხთან იოანეს შესახებ: რის სანახავად გახვედით უდაბნოში? ქარისაგან შერხეული ლერწმისა?
- 7მაშ, რისთვის გახვედით? რბილი ტანსაცმლით შემოსილი კაცის სანახავად? რბილი ტანსაცმლით შემოსილები მეფეთა სასახლეებში იმყოფებიან.
- 8მაშ, რისთვის გამოხვედით? წინასწარმეტყველის სანახავად? დიახ, გეუბნებით თქვენ, წინასწარმეტყველზე მეტისაც.
- 9ვინაიდან ეს არის იგი, რომლის შესახებაც დაწერილია: აი, მე ვგზავნი შენი სახის წინ ჩემს ანგელოზს, რომელიც განამზადებს შენს გზას შენს წინ.
- 10ჭეშმარიტად გეუბნებით თქვენ: დედაკაცთაგან ნაშობთა შორის არ აღმდგარა იოანე ნათლისმცემელზე დიდი; მაგრამ ცათა სასუფეველში უმცირესი მასზე დიდია.
- 11იოანე ნათლისმცემლის დღიდან აქამდე ცათა სასუფეველი ძალით იღება, ხოლო მოძალადენი წარიტაცებენ მას.
- 12ვინაიდან ყველა წინასწარმეტყველი და სჯული წინასწარმეტყველებდნენ იოანემდე.
- 13და თუ გსურთ მიღება, იგი არის ილია, რომელიც უნდა მოვიდეს.
- 14ვისაც ყურები აქვს, ისმინოს!
- 15მაგრამ ვის ვამსგავსო ეს მოდგმა? იგი წააგავს ბავშვებს, რომლებიც მოედნებზე სხედან და მიმართავენ სხვებს, ამხანაგებს
- 16და ეუბნებიან: სალამურს ვუკრავდით თქვენთვის და არ ცეკვავდით, ვგოდებდით და არ დამწუხრდით.
- 17ვინაიდან მოვიდა იოანე, არც ჭამს, არც სვამს, და ამბობენ: ეშმაკი ჰყავსო.
- 18მოვიდა ძე კაცისა, ჭამს და სვამს, და ამბობენ: აი კაცი რომელსაც უყვარს ჭამა და ღვინის სმა, მებაჟეთა და ცოდვილთა მეგობარი. და გამართლებულია სიბრძნე მისი საქმეებით.
- 19მაშინ მან იწყო იმ ქალაქების ყვედრება, სადაც ყველაზე მეტად გამოვლინდა მისი ძალთაქმედებანი, იმის გამო, რომ მათ არ მოინანიეს.
- 20ვაი შენ ქორაზინ, და ვაი შენ ბათსაიდა! ვინაიდან ტვიროსსა და სიდონში რომ მომხდარიყო ძალთაქმედებანი, რომლებიც თქვენთან მოხდა, ისინი დიდი ხანია ძაძებსა და ნაცარში მოინანიებდნენ.
- 21მაგრამ გეუბნებით თქვენ: ტვიროსისა და სიდონისათვის უფრო ადვილი იქნება სამსჯავროს დღეს, ვიდრე თქვენთვის.
- 22შენ კი, კაპერნაუმ, განა ცამდე ამაღლდები? ჯოჯოხეთამდე დაეშვები. ვინაიდან სოდომში რომ მომხდარიყო ის ძალთაქმედებანი, რომლებიც შენში მოხდა, იგი ამ დღემდე დარჩებოდა.
- 23ხოლო გეუბნებით თქვენ, რომ სოდომის მიწისათვის უფრო ადვილი იქნება სასამართლოს დღეს, ვიდრე შენთვის.
- 24იმ დროს იესო განაგრძობდა ლაპარაკს და თქვა: გადიდებ შენ, მამაო, უფალო ცისა და ქვეყნისაო, რამეთუ დაფარე ეს ბრძენთა და გონიერთაგან და განუცხადე ჩვილებს.
- 25ჰეი, მამაო! ვინაიდან ასეთი იყო შენი სათნოება.
- 26ყოველივე ჩემი მამის მიერ გადმომეცა მე, და არავინ იცნობს ძეს გარდა მამისა; არც მამას იცნობს ვინმე, გარდა ძისა, და ვისაც ძეს სურს განუცხადოს.
- 27მოდით ჩემთან, ყოველნო მაშვრალნო და ტვირთმძიმენო, და მე დაგამშვიდებთ თქვენ.
- 28აიღეთ თქვენზე ჩემი უღელი და ისწავლეთ ჩემგან, ვინაიდან მე მშვიდი და გულით თავმდაბალი ვარ, და პოვებთ სულის სიმშვიდეს.
- 29ვინაიდან ჩემი უღელი სასიამოვნოა და ჩემი ტვირთი მსუბუქი.
- 30იმ დროს იესომ გაიარა დათესილ ყანებში შაბათ დღეს. ხოლო მის მოწაფეებს შიოდათ, იწყეს თავთავების ფშვნეტა და ჭამა.
იტვირთება შემდეგი თავი