მათეს სახარება — ახალი აღთქმა, სტოკჰოლმი 1985
იტვირთება წინა თავი
თავი 14
- 1და უთხრა თავის მსახურებს: ეს არის იოანე ნათლისმცემელი, იგი აღდგა მკვდრეთით და ამიტომ ძალნი მოქმედებენ მასში.
- 2ვინაიდან ჰეროდემ შეიპყრო იოანე, შებორკა და საპყრობილეში ჩასვა თავისი ძმის, ფილიპეს ცოლის, - ჰეროდიას გამო.
- 3ვინაიდან იოანე ეუბნებოდა მას: შენთვის ნებადართული არაა მისი ყოლა.
- 4უნდოდა მისი მოკვლა, მაგრამ ხალხისა ეშინოდა, იმიტომ რომ წინასწარმეტყველად მიაჩნდათ იგი.
- 5ხოლო ჰეროდეს დაბადების დღეს ჰეროდიას ასული ცეკვავდა შეკრებილთა წინაშე და ასიამოვნა ჰეროდეს.
- 6ამიტომ ფიცით შეჰპირდა მას მიეცა, რაც არ უნდა მოეთხოვა.
- 7ხოლო მან, თავისი დედისაგან დარიგებულმა, უთხრა: მომეცი აქ ლანგრით იოანე ნათლისმცემლის თავი.
- 8შეწუხდა მეფე, მაგრამ ფიცისა და თანამეინახეთა გამო ბრძანა მიცემა.
- 9და წარგზავნა საპყრობილეში იოანესათვის თავის მოსაკვეთად.
- 10მოართვეს თავი ლანგრით და გადასცეს ქალიშვილს, მან კი თავის დედას მიართვა.
- 11მოვიდნენ მისი მოწაფეები, წაიღეს მისი ნეშტი და დამარხეს; მივიდნენ და შეატყობინეს იესოს.
- 12ეს რომ მოისმინა, იესო წავიდა იქიდან ნავით ერთ უდაბურ ადგილას განმარტოებით; ხოლო ხალხს რომ ესმა ეს, ფეხით გაჰყვა მას ქალაქებიდან.
- 13გამოვიდა და უამრავი ხალხი რომ დაინახა, შეეცოდა ისინი და განკურნა მათი სნეულები,
- 14როცა მოსაღამოვდა, მივიდნენ მასთან მოწაფეები და უთხრეს: აქ უდაბნო ადგილია, ჟამიც გვიანია; გაუშვი ეს ხალხი, რომ წავიდნენ სოფლებში და საჭმელი იყიდონ თავიანთთვის.
- 15იესომ კი უთხრა მათ: მაგათ არ სჭირდებათ წასვლა; თქვენ მიეცით მათ საჭმელი.
- 16ხოლო მათ უთხრეს მას: ჩვენ აქ მხოლოდ ხუთი პური და ორი თევზი გვაქვს.
- 17და მან უთხრა: მომიტანეთ მე ისინი აქ.
- 18უბრძანა ხალხს ბალახზე დასხდომა, აიღო ხუთი პური და ორი თევზი, ზეცას ახედა, აკურთხა, დაამტვრია და მისცა პურები მოწაფეებს, მოწაფეებმა კი - ხალხს.
- 19ყველამ ჭამა და გაძღა; და დარჩენილი ნატეხები აიღეს თორმეტი სავსე გოდორი.
- 20ხოლო ისინი, ვინც ჭამა, დაახლოებით ხუთი ათასი კაცი იყო, გარდა დედაკაცებისა და ბავშვებისა.
- 21და მაშინვე აიძულა იესომ თავისი მოწაფეები ნავში ჩამსხდარიყვნენ და მასზე ადრე გასულიყვნენ მეორე მხარეს, ვიდრე ის ხალხს გაუშვებდა.
- 22და გაუშვა ხალხი, მთაზე ავიდა, რომ განმარტოებით ელოცა; საღამო დადგა და მარტო იყო იქ.
- 23ხოლო ნავი უკვე მრავალ სტადიონზე წასულიყო ხმელეთიდან და უბედურებაში იყო ტალღებისაგან, იმიტომ რომ პირქარი იყო.
- 24ღამის მეოთხე გუშაგობისას მივიდა მათთან იესო პირდაპირ ზღვაზე სიარულით.
- 25მოწაფეებმა რომ დაინახეს იგი ზღვაზე მავალი, შეძრწუნდნენ და თქვეს: ეს მოჩვენებააო, და შიშისაგან შეჰყვირეს.
- 26მაგრამ იესო მყისვე გამოელაპარაკა მათ და უთხრა: გამხნევდით, მე ვარ, ნუ გეშინიათ!
- 27პეტრემ უთხრა მას პასუხად: უფალო, თუ ეს შენა ხარ, მიბრძანე, მოვიდე შენთან წყალდაწყალ.
- 28მან კი უთხრა: მოდი! პეტრე გადმოვიდა ნავიდან და წყალდაწყალ მიდიოდა, რომ იესოსთან მისულიყო.
- 29მაგრამ, ქარი რომ შენიშნა, შეეშინდა, ჩაძირვა იწყო და დაიყვირა: უფალო, მიხსენი მე!
- 30იესომ იმწამსვე გაუწოდა ხელი, მოჰკიდა მას და უთხრა: რატომ დაეჭვდი, მცირედ მორწმუნევ?
- 31და როცა ისინი ნავში ავიდნენ, ქარი ჩადგა.
- 32ხოლო ნავში მყოფებმა თაყვანი სცეს მას და უთხრეს: ჭეშმარიტად ხარ შენ ძე ღმერთისა.
- 33გადავიდნენ და მივიდნენ გენესარეთის ქვეყანაში.
- 34იმ ადგილის ხალხმა იცნო იგი, წარგზავნეს მის ყოველ მხარეს და მოუყვანეს მას ყველა ავდმყოფი.
- 35და ევედრებოდნენ მას, რომ მხოლოდ მისი სამოსის კიდეს შეხებოდნენ; და ვინც შეეხო, განიკურნა.
- 36მაშინ მივიდნენ იესოსთან იერუსალიმელი ფარისეველნი და მწიგნობარნი და უთხრეს:
იტვირთება შემდეგი თავი