მათეს სახარება — ახალი აღთქმა, სტოკჰოლმი 1985
იტვირთება წინა თავი
თავი 19
- 1მაშინ მივიდნენ მასთან ფარისეველნი და გამოსაცდელად უთხრეს: ნებადართულია კაცისათვის თავისი ცოლი გაუშვას ყოველნაირი მიზეზით?
- 2ხოლო მან უთხრა პასუხად: ნუთუ არ წაგიკითხავთ, რომ შემოქმედმა დასაბამიდან მამაკაცად და დედაკაცად შექმნა ისინი?
- 3და თქვა: ამიტომ მიატოვებს კაცი მამას და დედას, მიეკვრება თავის ცოლს და ორნი იქნებიან ერთ ხორცად.
- 4ამრიგად, ისინი უკვე ორი კი არა, ერთი ხორცი არიან. ამიტომ, ვინც ღმერთმა შეაუღლა, დაე, კაცი ნუ დააშორებს მათ.
- 5მათ კი უთხრეს მას: მაშ, მოსემ რატომ დადო მცნებად გაყრილობის მოწმობის მიცემა და გაშვება?
- 6ეუბნება მათ: მოსემ თქვენი გულქვაობის გამო მოგცათ თქვენი ცოლების გაშვების ნება, დასაბამიდან კი ასე არ ყოფილა.
- 7მაგრამ მე გეუბნებით თქვენ: ვინც თავის ცოლს გაუშვებს, არა სიძვის გამო, და სხვას შეირთავს, მრუშობს.
- 8უთხრეს მას მოწაფეებმა: თუკი ასეთია კაცის დამოკიდებულება ცოლის მიმართ, უმჯობესია ცოლი არ შეირთოს.
- 9მან კი უთხრა მათ: ყველა ვერ შეითვისებს ამ სიტყვას, არამედ, ვისაც აქვს მიცემული.
- 10ვინაიდან არიან საჭურისნი; რომელნიც თავიანთი დედის მუცლიდან ასე იშვნენ; და არიან საჭურისნი, რომელნიც ადამიანებმა დაასაჭურისეს; და არიან საჭურისნი, რომელთაც თვითონ დაისაჭურისეს თავი ცათა სასუფევლისათვის. ვისაც შეუძლია შეთვისება, შეითვისოს.
- 11მაშინ მოიყვანეს მასთან ბავშვები, რომ ხელი დაედო და ელოცა მათთვის, მოწაფეები კი საყვედურობდნენ მათ.
- 12ხოლო იესომ უთხრა: გამოუშვით ბავშვები და ნუ აბრკოლებთ მოვიდნენ ჩემთან, ვინაიდან მაგისთანებისაა ცათა სასუფეველი.
- 13დაადო მათ ხელი და წავიდა იქიდან.
- 14და აი, მივიდა მასთან ვიღაც და უთხრა: მოძღვარო, რა სიკეთე ჩავიდინო, რომ საუკუნო სიცოცხლე მექნეს?
- 15ხოლო მან უთხრა მას: რატომ მეკითხები სიკეთის შესახებ? ერთი არის კეთილი. ხოლო თუ ცხოვრებაში შესვლა გინდა, დაიცავი მცნებანი.
- 16ეუბნება მას: რომელნი? ხოლო იესომ უთხრა მას: არ მოკლა, არ იმრუშო, არ მოიპარო, არ იყო ცრუმოწმე.
- 17პატივი ეცი მამას და დედას და შეიყვარე მოყვასი შენი, ვითარცა თავი შენი.
- 18ჭაბუკმა უთხრა მას: ყოველივე ამას ვიცავდი; რაღა მაკლია კიდევ?
- 19უთხრა მას იესომ: თუ გინდა, რომ სრულყოფილი იყო, წადი, შენი ქონება გაყიდე და მიეცი ღარიბებს; და გექნება საუნჯე ზეცაში და მოდი და გამომყევი.
- 20ეს სიტყვა რომ მოისმინა ჭაბუკმა, დაღონებული განშორდა, ვინაიდან ბევრი მამულები ჰქონდა.
- 21იესომ კი უთხრა ტავის მოწაფეებს: ჭეშმარიტად გეუბნებით თქვენ, ძნელია მდიდრისათვის ცათა სასუფეველში შესვლა.
- 22კიდევ გეუბნებით თქვენ: უფრო ადვილია აქლემის გაძრომა ნემსის ყუნწში, ვიდრე მდიდრის შესვლა ღმერთის სასუფეველში.
- 23ეს რომ მოისმინეს, ძალიან გაუკვირდათ მის მოწაფეებს და თქვეს: მაშ, ვის შეუძლია გადარჩეს?
- 24გადახედა მათ იესომ და უთხრა: კაცთა მიერ შეუძლებელია ეს, ხოლო ღმერთის მიერ ყოველივეა შესაძლებელი.
- 25მაშინ პეტრემ უთხრა მას პასუხად: აი, ჩვენ ყოველივე მივატოვეთ და გამოგყევით შენ; რა გვექნება ჩვენ?
- 26მაშინ პეტრემ უთხრა მას პასუხად: აი, ჩვენ ყოველივე მივატოვეთ და გამოგყევით შენ; რა გვექნება ჩვენ?
- 27ხოლო იესომ უთხრა მათ: ჭეშმარიტად გეუბნებით თქვენ; რომ თქვენ, რომლებიც გამომყევით მე, მეორედ დაბადებისას, როცა ძე კაცისა თავისი დიდების ტახტზე დაჯდება, თქვენც დასხდებით თორმეტ ტახტზე ისრაელის თორმეტი ტომის გასასამართლებლად.
- 28და ყოველი, ვინც დატოვა სახლები, ან ძმები, ან დები, ან მამა, ან დედა, ან შვილები, ან მინდვრები, ჩემი სახელის გულისათვის, მრავალგზის მიიღებს და საუკუნო სიცოცხლეს დაიმკვიდრებს.
- 29ბევრნი კი იქნებიან - პირველნი უკანასკნელნი და უკანასკნელნი - პირველნი.
- 30ვინაიდან სასუფეველი ცათა წააგავს ადამიანს - სახლის პატრონს, რომელიც დილაადრიან გამოვიდა თავის ვენახში მუშათა დასაქირავებლად.
იტვირთება შემდეგი თავი