მათეს სახარება — ახალი აღთქმა, სტოკჰოლმი 1985

თავი 26

1. 1
   როცა იესომ ყველა ეს სიტყვა დაასრულა, თავის მოწაფეებს უთხრა:
2. 2
   თქვენ იცით, რომ ორი დღის შემდეგ პასექი იქნება და ძე კაცისა გადაიცემა ჯვარზე საცმელად.
3. 3
   მაშინ შეიკრიბნენ მღვდელმთავარნი და ხალხის უხუცესნი კაიაფად წოდებული მღვდელმთავრის ეზოში.
4. 4
   და მოითათბირეს იესოს მზაკვრულად შეპყრობა და მოკვლა.
5. 5
   მაგრამ ამბობდნენ: დღესასწაულზე არა, რომ ხალხში არ მოხდეს აღშფოთება.
6. 6
   როცა იესო ბეთანიაში იყო, სიმონ კეთროვნის სახლში,
7. 7
   მოვიდა მასთან დედაკაცი, მოიტანა ძვირფასი ნელსაცხებელი ალებასტრონით და სუფრასთან მჯდომარეს თავზე მოასხა.
8. 8
   მოწაფეებმა რომ დაინახეს, გაბრაზდნენ და თქვეს: რისთვის დაიკარგა ეს?
9. 9
   ვინაიდან შეიძლებოდა ამ ნელსაცხებლის გაყიდვა დიდ ფასად და ღარიბებისათვის დარიგება.
10. 10
    მაგრამ იესო მიუხვდა და უთხრა მათ: რატომ აწბილებთ ამ დედაკაცს? ხომ კეთილი საქმე გააკეთა ჩემთვის.
11. 11
    ვინაიდან ღარიბნი მუდამ თვენთან გყავთ, მე კი მუდამ არ გეყოლებით.
12. 12
    ეს ნელსაცხებელი რომ დაასხა ჩემს სხეულს, მე მომამზადა დასამარხად.
13. 13
    ჭეშმარიტად გეუბნებით თქვენ: სადაც კი იქადაგებენ ამ სახარებას მთელ ქვეყნიერებაზე ითქმევა, რაც მაგან გააკეთა, მაგის მოსაგონებლად.
14. 14
    მაშინ ერთი იმ თორმეტთაგანი, იუდა ისკარიოტელად წოდებული, წავიდა მღვდელმთავრებთან.
15. 15
    და უთხრა: რას მომცემთ, და მე გადმოგცემთ მას? მათ მიუწონეს ოცდაათი ვერცხლი.
16. 16
    მას შემდეგ ეძებდა მარჯვე შემთხვევას, რომ იგი გაეცა.
17. 17
    ხმიადობის პირველ დღესვე მივიდნენ მოწაფეები იესოსთან და უთხრეს მას: სად გინდა, რომ მოგიმზადოთ საჭმელად პასექი?
18. 18
    მან კი უთხრა: წადით ქალაქში ასეთ და ასეთთან და უთხარით მას: ამბობს მოძღვარი: ჩემი ჟამი მოახლოებულია, შენთან დავიყენებ პასექს ჩემს მოწაფეებთან ერთად.
19. 19
    მოწაფეები ისე მოიქცნენ, როგორც იესომ უბრძანა და მოამზადეს პასექი.
20. 20
    რომ მოსაღამოვდა, დაჯდა თორმეტ მოწაფესთან ერთად.
21. 21
    როცა ისინი ჭამდნენ, თქვა: ჭეშმარიტად გეუბნებით თქვენ: ერთი თქვენგანი გამცემს.
22. 22
    ისინი ძალიან შეწუხდნენ და ყოველმა მათგანმა დაუწყო ლაპარაკი: მე ხომ არა, უფალო?
23. 23
    ხოლო მან უთხრა მათ პასუხად: ვინც ჩემთან ხელს ჩაყოფს ჯამში, ის გამცემს.
24. 24
    თუმცა ძე კაცისა მიდის, როგორც დაწერილია მის შესახებ. მაგრამ ვაი იმ კაცს, ვის მიერაც გაიცემა ძე კაცისა; იმ კაცისათვის უმჯობესი იყო არ დაბადებულიყო.
25. 25
    იუდამ, რომელმაც იგი გასცა, პასუხად უთხრა: მე ხომ არა, რაბი? - შენ თქვი, - უთხრა მას.
26. 26
    როცა ისინი ჭამდნენ, აიღო იესომ პური, აკურთხა, დაამტვრია, მისცა მოწაფეებს და თქვა: აიღეთ, ჭამეთ; ეს ჩემი სხეულია.
27. 27
    აიღო სასმისი, მადლობდა და მისცა მათ და უთხრა: ყველამ დალიეთ აქედან,
28. 28
    ვინაიდან ეს არის ჩემი სისხლი ახალი აღთქმისა, მრავალთათვის რომ იღვრება ცოდვების მისატევებლად.
29. 29
    და მე გეუბნებით: ამიერიდან აღარ დავლევ ვაზის ამ ნაყოფისაგან, იმ დღემდე, როცა თქვენთან ერთად დავლევ მას, ახალს ჩემი მამის სასუფეველში.
30. 30
    იგალობეს და წავიდნენ ზეთისხილის მთაზე.
31. 31
    მაშინ უთხრა მათ იესომ: თქვენ ყველანი ცდუნდებით ამაღამ ჩემს გამო, ვინაიდან დაწერილია: დავარტყამ მწყემსს და დაიფანტებიან ფარის ცხვრები.
32. 32
    ხოლო ჩემი აღდგომის შემდეგ თქვენს წინ წავალ გალილეაში.
33. 33
    მიუგო პეტრემ მას პასუხად: თუნდაც ყველანი ცდუნდნენ შენს გამო, მე არასოდეს არ ვცდუნდები.
34. 34
    უთხრა მას იესომ: ჭეშმარიტად გეუბნები შენ, ამაღამ, სანამ მამალი იყივლებს, სამჯერ უარმყოფ მე.
35. 35
    უთხრა მას პეტრემ: თუნდაც რომ მოვკვდე შენთან, არ უარგყოფ. ასევე ამბობდა ყველა მოწაფე.
36. 36
    მერე იესო მივიდა მათთან ერთ ადგილზე, რომელსაც გეთსემანია ჰქვია, და უთხრა მოწაფეებს: აქ დასხედით, ვიდრე იქ წავალ და ვილოცებ.
37. 37
    თან წაიყვანა პეტრე და ზებედეს ორივე ძე, იწყო წუხილი და დარდი.
38. 38
    მაშინ უთხრა მათ: სასიკვდილოდ არის დამწუხრებული ჩემი სული. იყავით აქ და იფხიზლეთ ჩემთან ერთად.
39. 39
    ცოტა გაიარა, პირქვე დაემხო, ლოცულობდა და ამბობდა: მამაო ჩემო, თუ შესაძლოა ამაცდინე ეს სასმისი; მაგრამ არა, როგორც მე მინდა, არამედ, როგორც შენ.
40. 40
    და მიდის მოწაფეებთან და პოვებს მათ მძინარეთ და ეუბნება პეტრეს: ნუთუ ვერ შესძელით ერთ საათს გეფხიზლათ ჩემთან?
41. 41
    იფხიზლეთ და ილოცეთ, რომ არ ჩავარდეთ განსაცდელში. სული მხნეა, ხოლო ხორცი უძლური.
42. 42
    მეორედაც წავიდა, ლოცულობდა და ამბობდა: მამაო ჩემო, თუ არ შეუძლია ამ სასმისს ამცდეს, რომ არ დავლიო იგი, იქნეს შენი ნება.
43. 43
    და კვლავ მივიდა და ისევ მძინარენი პოვა ისინი, ვინაიდან თვალები დამძიმებოდათ.
44. 44
    მიატოვა ისინი, კვლავ წავიდა და მესამედ ილოცა, კვლავ იგივე სიტყვები წარმოთქვა.
45. 45
    მაშინ მიდის მოწაფეებთან და ეუბნება მათ: თქვენ ისევ გძინავთ და ისვენებთ? აი, მოახლოვდა საათი და ძე კაცისა გადაეცემა ცოდვილთა ხელთ.
46. 46
    ადექით, წავიდეთ, აგერ, მოახლოვდა ჩემი გამცემი.
47. 47
    და ჯერ კიდევ ლაპარაკობდა, აი, მოვიდა იუდა, ერთი თორმეტთაგანი, მასთან ერთად დიდძალი ხალხი მახვილებით და კეტებით - მღვდელმთავრებისგან და ხალხის უხუცესთაგან.
48. 48
    ხოლო მისმა გამცემმა მისცა მათ ნიშანი და უთხრა: ვისაც მე ვეამბორები, ის არის, შეიპყარით.
49. 49
    მყისვე მივიდა იესოსთან და უთხრა: გიხაროდეს რაბი! - და ეამბორა.
50. 50
    ხოლო იესომ უთხრა მას: რისთვის მოსულხარ მეგობარო? მაშინ მივიდნენ, ხელები დაადეს იესოს და შეიპყრეს იგი.
51. 51
    და აი, ერთ-ერთმა იესოსთან მყოფმა ხელი გაიწოდა, იძრო თავისი მახვილი, დასცხო მღვდელმთავრის მონას და ყური მოკვეთა.
52. 52
    მაშინ იესომ უთხრა მას: თავის ადგილას ჩააბრუნე ეგ მახვილი, ვინაიდან ყველა, ვინც მახვილს აიღებს, მახვილით დაიღუპება.
53. 53
    იქნებ გგონია, რომ არ შემიძლია შევევედრო ჩემს მამას და მან წარმომიდგინოს ახლა თორმეტზე მეტი ანგელოზთა ლეგიონი?
54. 54
    მაშინ როგორ აღსრულდება წერილი, რომ ასე უნდა მოხდეს?
55. 55
    იმ საათს უთხრა იესომ იმ ხალხს: თითქოს ავაზაკის წინააღმდეგ, მახვილებით და კეტებით გამოხვედით ჩემს შესაპყრობად; ყოველდღე ვიჯექი ტაძარში სასწავლებლად და არ შეგიპყრივართ მე.
56. 56
    ყოველივე ეს მოხდა იმიტომ, რომ აღსრულდეს წინასწარმეტყველთა წერილები. მაშინ ყველა მოწაფემ მიატოვა იგი და გაიქცა.
57. 57
    იესოს შემპრობლებმა კი წაიყვანეს მღვდელმთავარ კაიაფასთან, სადაც შეკრებილიყვნენ მწიგნობარნი და უხუცესნი.
58. 58
    ხოლო პეტრე მოშორებით მიჰყვებოდა მას მღვდელმთავრის ეზომდე, შევიდა შიგნით და მსახურებთან დაჯდა აღსასრულის სანახავად.
59. 59
    მღვდელმთავარნი და მთელი სინედრიონი ეძებდნენ ცრუმოწმეობას იესოს წინააღმდეგ, რომ სიკვდილით დაესაჯათ იგი.
60. 60
    და ვერ პოულობდნენ, თუმცა ბევრი ცრუმოწმე მოდიოდა; ხოლო ბოლოს მოვიდნენ ორნი
61. 61
    და თქვეს: ეს ამბობდა: შემიძლია ღვთის ტაძარი დავანგრიო და სამ დღეში ავაშენო.
62. 62
    მაშინ წამოდგა მღვდელმთავარი და უთხრა მას: არაფერს უპასუხებ, ესენი რომ შენს წინააღმდეგ მოწმობენ?
63. 63
    იესო დუმდა. და მღვდელმთავარმა უთხრა მას: ცოცხალ ღმერთს გაფიცებ, გვითხარი, შენ ხარ ქრისტე, ძე ღმერთისა?
64. 64
    უთხრა იესომ: შენ თქვი. მაგრამ მე გეუბნებით თქვენ: ამიერიდან იხილავთ ძე კაცისას ძალის მარჯვნივ მჯდომარეს და ცის ღრუბლებზე მომავალს.
65. 65
    მაშინ მღვდელმთავარმა დაინახა თავისი სამოსელი და თქვა: ეს გმობს. რაღად გვჭირდება მოწმენი? აი, ახლა გესმათ გმობა.
66. 66
    როგორ გგონიათ? ხოლო მათ მიუგეს პასუხად: სიკვდილს იმსახურებს.
67. 67
    მაშინ აფურთხებდნენ მას სახეში და ცემდნენ და სილას აწნავდნენ.
68. 68
    და ეუბნებოდნენ: გვიწინასწარმეტყველე ქრისტე ვინ დაგარტყა?
69. 69
    ხოლო პეტრე იჯდა გარეთ ეზოში. მივიდა მასთან ერთი მოახლე და უთხრა: შენც იესო გალილეველთან იყავი.
70. 70
    მან კი უარყო ყველას წინაშე და თქვა: არ ვიცი რას ლაპარაკობ.
71. 71
    როცა ჭიშკრის გარეთ გამოდიოდა, სხვამ დაინახა და უთხრა იქ მყოფებს: ეს იესო ნაზარეველთან იყო.
72. 72
    მან კვლავ უარყო ფიცით: არ ვიცნობ ამ კაცს.
73. 73
    ცოტა ხნის შემდეგ მიუახლოვდნენ იქ მდგომნი და უთხრეს პეტრეს: ნამდვილად მათგანი ხარ შენც, ვინაიდან შენივე ლაპარაკი გამხილებს შენ.
74. 74
    მაშინ იწყო წყევლა და ფიცი: არ ვიცნობ ამ კაცს. მყისვე იყივლა მამალმა.
75. 75
    და გაახსენდა პეტრეს იესოს ნათქვამი სიტყვა: სანამ მამალი იყივლებდეს, სამჯერ უარმყოფ მე. გამოვიდა გარეთ და მწარედ ტიროდა.