დაბადება — ახალი ქვეყნიერების თარგმანი*

თავი 13

1. 1
   ეგვიპტიდან აბრამი ნეგებისკენ წავიდა თავის ცოლთან და ლოტთან ერთად. თან წაიღეს მთელი ქონება.
2. 2
   ბევრი საქონელი ჰყავდა აბრამს და დიდძალი ოქროვერცხლი ჰქონდა.
3. 3
   ნეგებიდან გამოსული გზადაგზა ბანაკდებოდა ბეთელამდე. მივიდა იმ ადგილას, სადაც პირველად გაშალა კარავი ბეთელსა და აის შორის,
4. 4
   და სადაც თავდაპირველად ააგო სამსხვერპლო. მოუხმო იქ აბრამმა იეჰოვას სახელს.
5. 5
   ლოტსაც, რომელიც აბრამთან ერთად მიდიოდა, ჰყავდა ცხვარძროხა და ჰქონდა კარვები.
6. 6
   ვერ იტევდა ის მიწა ყველას, რადგან დიდძალი ქონება დააგროვეს და შეუძლებელი იყო, რომ ერთად ეცხოვრათ.
7. 7
   დაიწყეს დავა აბრამისა და ლოტის მწყემსებმა; მაშინ ქანაანელები და ფერიზელები ცხოვრობდნენ იმ მიწაზე.
8. 8
   აბრამმა ლოტს სთხოვა: „მოდი, ნუ ვიდავებთ, ნურც ჩვენ და ნურც ჩვენი მწყემსები, რადგან ძმები ვართ.
9. 9
   შენ წინაშეა მთელი მიწა. გამეყარე. თუ მარცხნივ წახვალ, მე მარჯვნივ წავალ; და თუ მარჯვნივ წახვალ, მე მარცხნივ წავალ“.
10. 10
    გაიხედა ლოტმა და დაინახა მთელი იორდანის წყალუხვი მხარე ცოარამდე, რომელიც იეჰოვას ბაღივით იყო და ეგვიპტის მიწას ჰგავდა, სანამ იეჰოვა სოდომსა და გომორას გაანადგურებდა.
11. 11
    აირჩია ლოტმა თავისთვის მთელი იორდანის მხარე, აღმოსავლეთით დაბანაკდა და გაეყარნენ ერთმანეთს.
12. 12
    აბრამი ქანაანის მიწაზე დასახლდა, ლოტი კი - იმ მხარის ქალაქებს შორის, და სოდომის მახლობლად გაშალა კარავი.
13. 13
    ბოროტები იყვნენ სოდომელები და დიდად სცოდავდნენ იეჰოვას.
14. 14
    მას შემდეგ, რაც ლოტი აბრამს გაეყარა, იეჰოვამ სთხოვა მას: „ასწიე თავი და გაიხედე ჩრდილოეთისკენ, სამხრეთისკენ, აღმოსავლეთისკენ და დასავლეთისკენ,
15. 15
    რადგან შენ და შენს შთამომავალს სამუდამოდ მოგცემთ მთელ მიწას, რომელსაც ხედავ.
16. 16
    ქვიშასავით გავამრავლებ შენს შთამომავალს, და თუ კაცი ქვიშას დათვლის, მაშინ შენი შთამომავლობაც დაითვლება.
17. 17
    ადექი და მოიარე მთელი ეს მიწა, რადგან შენ მოგცემ მას.
18. 18
    კარვებში ცხოვრობდა აბრამი. მოგვიანებით მივიდა და დასახლდა მამრეს დიდ ხეებს შორის ხებრონში. იქ სამსხვერპლო აუგო იეჰოვას.