დაბადება — ახალი ქვეყნიერების თარგმანი*

თავი 15

1. 1
   აბრამს ხილვაში იეჰოვას სიტყვა გამოეცხადა: „აბრამ, ნუ გეშინია! მე ვარ შენი ფარი. დიდ ჯილდოს მიიღებ“.
2. 2
   აბრამმა მიუგო: „უზენაესო უფალო იეჰოვა, რას მომცემ? შვილი არა მყავს და ჩემი სახლი დამასკოელმა ელიეზერმა უნდა დაიმკვიდროს“.
3. 3
   განაგრძო აბრამმა: „არ მოგიცია ჩემთვის შთამომავალი და, აი, ჩემი სახლის მსახური ხდება ჩემი მემკვიდრე“.
4. 4
   მაგრამ იეჰოვამ ასე უთხრა: „არ გახდება ეს კაცი შენი მემკვიდრე. შენგან გამოსული გახდება შენი მემკვიდრე“.
5. 5
   გარეთ გაიყვანა და სთხოვა: „ახედე ზეცას და დაითვალე ვარსკვლავები, თუ შეძლებ მათ დათვლას“. შემდეგ უთხრა: „ასევე იქნება შენი შთამომავლობაც“.
6. 6
   ერწმუნა იგი იეჰოვას და მან სიმართლედ ჩაუთვალა ეს.
7. 7
   მან განაგრძო: „მე ვარ იეჰოვა, რომელმაც გამოგიყვანე ქალდეველთა ურიდან, რათა დასამკვიდრებლად მოგცე ეს ქვეყანა“.
8. 8
   ამაზე მან მიუგო: „უზენაესო უფალო იეჰოვა, როგორ გავიგო, რომ მე დავიმკვიდრებ მას?“
9. 9
   პასუხად მან უთხრა: „მომიყვანე სამი წლის დეკეული, სამი წლის დედალი თხა, სამი წლის ვერძი, გვრიტი და მტრედის ხუნდი“.
10. 10
    წაიყვანა ისინი, ორად გაკვეთა და ნაჭრები ერთიმეორის შესაბამისად დააწყო; ფრინველები არ გაუკვეთავს.
11. 11
    დააცხრნენ მტაცებელი ფრინველები დაკლულ ცხოველებს, აბრამი კი იგერიებდა.
12. 12
    მოგვიანებით, მზის ჩასვლისას, ღრმა ძილმა შეიპყრო აბრამი და, აი, შიშის მომგვრელმა უკუნმა სიბნელემ მოიცვა იგი.
13. 13
    უთხრა ღმერთმა აბრამს: „შენი შთამომავლობა ხიზნად იცხოვრებს სხვების მიწაზე და მათი მსახურები გახდებიან; ოთხას წელიწადს დაჩაგრავენ მათ.
14. 14
    მაგრამ მე გავასამართლებ იმ ერს, რომლის მსახურებიც იქნებიან, და გამოვლენ იქიდან დიდძალი ქონებით.
15. 15
    შენ კი მშვიდობით წახვალ შენს წინაპრებთან; კარგი სიბერით მოკვდები.
16. 16
    მეოთხე თაობაში დაბრუნდებიან ისინი, რადგან ამორეველთა დანაშაული ზღვარს ჯერ არ გასცდენია“.
17. 17
    მზე ჩავიდა, უკუნი სიბნელე ჩამოწვა და, აი, აბოლებულმა ღუმელმა და ცეცხლოვანმა ჩირაღდანმა ჩაიარა იმ ნაჭრებს შორის.
18. 18
    იმ დღეს დაუდო იეჰოვამ აბრამს შეთანხმება: „შენს შთამომავალს მივცემ ამ ქვეყანას, ეგვიპტის მდინარიდან დიდ მდინარემდე, ევფრატამდე:
19. 19
    კენიელთა, კენიზელთა, კადმონელთა,
20. 20
    ხეთელთა, ფერიზელთა, რეფაიმთა,
21. 21
    ამორეველთა, ქანაანელთა, გირგაშელთა და იებუსელთა ქვეყანას“.