დაბადება — ახალი ქვეყნიერების თარგმანი*

თავი 3

1. 1
   გველი ყველაზე ფრთხილი იყო გარეულ ცხოველებს შორის, რომლებიც იეჰოვა ღმერთმა შექმნა. უთხრა გველმა ქალს: „მართლა გითხრათ ღმერთმა, ბაღის ყველა ხიდან არ ჭამოთო?“
2. 2
   ქალმა გველს მიუგო: „ბაღის ხის ნაყოფები შეგვიძლია ვჭამოთ,
3. 3
   მაგრამ იმ ხის ნაყოფზე, რომელიც ბაღის შუაგულში დგას, ღმერთმა გვითხრა: არ შეჭამოთ, არც კი შეეხოთ, რომ არ მოკვდეთო“.
4. 4
   ამაზე გველმა უთხრა ქალს: „არა, არ მოკვდებით.
5. 5
   იცის ღმერთმა, რომ რა დღესაც შეჭამთ მის ნაყოფს, თვალი აგეხილებათ და ღმერთივით სიკეთისა და ბოროტების მცოდნენი გახდებით“.
6. 6
   მაშინ დაინახა ქალმა, რომ იმ ხეს საჭმელად კარგი და თვალისთვის მიმზიდველი ნაყოფი ჰქონდა. ხე მართლაც თვალწარმტაცი იყო. მოწყვიტა მისი ნაყოფი და შეჭამა. მოგვიანებით კი ქმარსაც მისცა, როცა ერთად იყვნენ, და მანაც შეჭამა.
7. 7
   ორივეს აეხილათ თვალი და დაინახეს, რომ შიშვლები იყვნენ. გადააბეს ლეღვის ფოთლები ერთმანეთს და წელზე შემოირტყეს.
8. 8
   მოგვიანებით იეჰოვა ღმერთის ხმა შემოესმათ. ის საღამო ხანს, როცა ნიავი უბერავს, ბაღში მიმოდიოდა. დაემალნენ იეჰოვა ღმერთს კაცი და მისი ცოლი ბაღის ხეებს შორის.
9. 9
   ეძახდა იეჰოვა ღმერთი კაცს: „სადა ხარ?“
10. 10
    ბოლოს მან უპასუხა: „შენი ხმა შემომესმა ბაღში და შემეშინდა, რადგან შიშველი ვიყავი, და დავიმალე“.
11. 11
    მაშინ ღმერთმა უთხრა: „ვინ გითხრა, რომ შიშველი იყავი? იმ ხის ნაყოფი ხომ არ ჭამე, მე რომ გიბრძანე, არ ჭამომეთქი?“
12. 12
    კაცმა მიუგო: „შენ რომ ქალი მომიყვანე, მან მომცა იმ ხის ნაყოფი და მეც ვჭამე“.
13. 13
    მაშინ იეჰოვა ღმერთმა ქალს უთხრა: „ეს რა ჩაიდინე?!“ ქალმა მიუგო: „გველმა... მან მაცდუნა და მეც ვჭამე“.
14. 14
    იეჰოვა ღმერთმა გველს უთხრა: „რადგან ეს ჩაიდინე, დაწყევლილი ხარ ყველა შინაურ და გარეულ ცხოველს შორის. მუცლით იხოხებ და მტვერს შეჭამ მთელი შენი სიცოცხლე.
15. 15
    მტრობას ჩამოვაგდებ შენსა და ქალს შორის, შენს შთამომავლობასა და მის შთამომავლობას შორის. ის თავს გაგიჭეჭყავს, შენ კი ქუსლს დაუგესლავ“.
16. 16
    ქალს კი უთხრა: „გაგიძლიერებ ტკივილებს ორსულობისას და მშობიარობის ტკივილებით გააჩენ შვილებს. ქმრისკენ გექნება ლტოლვა, ის კი იბატონებს შენზე“.
17. 17
    შემდეგ ადამს უთხრა: „რადგან მოუსმინე შენი ცოლის ხმას და შეჭამე იმ ხის ნაყოფი, რომელზეც გითხარი, არ ჭამომეთქი, დაწყევლილია მიწა შენ გამო. ტანჯვით შეჭამ მის ნაყოფს მთელი შენი სიცოცხლე;
18. 18
    ნარსა და ეკალს აღმოგიცენებს და მიწის მცენარეებს შეჭამ;
19. 19
    პიროფლიანი შეჭამ პურს, სანამ მიწას დაუბრუნდები, რადგან მისგან ხარ აღებული; მტვერი ხარ და მტვრადვე იქცევი“.
20. 20
    ამის შემდეგ ადამმა თავის ცოლს ევა უწოდა, რადგან ის უნდა გამხდარიყო ყოველი ცოცხლის დედა.
21. 21
    იეჰოვა ღმერთმა ტყავის გრძელი სამოსელი მისცა ადამსა და მის ცოლს და შემოსა ისინი.
22. 22
    შემდეგ თქვა იეჰოვა ღმერთმა: „აი, ადამიანი გახდა როგორც ერთი ჩვენგანი, სიკეთისა და ბოროტების მცოდნე. ახლა, ხელი რომ არ გაიწოდოს, სიცოცხლის ხის ნაყოფიც არ მოწყვიტოს, არ შეჭამოს და მარადიულად არ იცოცხლოს...“
23. 23
    მაშინ გააძევა იეჰოვა ღმერთმა იგი ედემის ბაღიდან, რათა დაემუშავებინა მიწა, რომლისგანაც იყო აღებული.
24. 24
    გააძევა კაცი, ედემის ბაღის აღმოსავლეთით ქერუბიმები დააყენა და გააკეთა მბრუნავი ცეცხლოვანი მახვილი, რომ დაეცვა სიცოცხლის ხისკენ მიმავალი გზა.